KUVELA ukuthi uqale wabikela izihlobo ukuthi uzobulala umkakhe, umyeni osolwa ngokugwaza abulale unesi obesebenza esibhedlela eMgungundlovu. Isidumbu sikaNkk Nontobeko Kheswa (41) obesebenza esibhedlela e-Edendale, sitholwe sinamanxeba okugwaza kugcwele igazi. Kuthiwa umufi ubeya emsebenzini, esagqoke nomfaniswano. Okhulumela umndeni kamufi, ocele ukungadalulwa ngenxa yokwesaba, uthe umufi ubevele enezinkinga emshadweni. Uthe abengapheli amasonto amabili engabikanga kubo ngezinkinga zakhe.
“NgoJanuwari wazama ukubika kosonhlalakahle emuva kokushaywa wumyeni wakhe. Watshelwa ukuthi abaxoxe kuqala, uma behluleka ambophe. Nathi sazama ukungenela ezingxoxweni, kube ngathi sekuhamba kahle, kuphinde kuqale izingxabano.”
Leli lungu lomndeni lithe esontweni eledlule ubengakaze abatshele lutho. Kuthiwa umsolwa uqale emzini wesihlobo sikamufi, wayobika ukuthi uzombulala. Kuthiwa ubephethe isibhamu nezinhlamvu. Umndeni kamufi ubusazama ukuyomxwayisa kanti ususindwe izinyawo. Kusolwa ukuthi umsolwa umthathe ngemoto umufi, isidumbu sakhe wasilahla ehlathini.
Kusolwa ukuthi udlule komunye unesi wesilisa wamdubula engalweni, kwalimala nomfowabo abebenaye emotweni. Mayelana nalesi sigameko umndeni kamufi uthe awazi lutho.
Okhulumela amaphoyisa KwaZulu-Natal uCol Thembeka Mbele, uthe isidumbu sikanesi sitholwe namanxeba amaningi ngezithuba zabo 11.30 ebusuku bangoLwesihlanu.
“Kuvulwe icala lokubulala esiteshini samaphoyisa, eMountain Rise eMgungundlovu,” kusho uCol Mbele.
Akakuqinisekisanga ukuboshwa kukamsolwa, okuvezwe esitatimendeni sikaNgqongqoshe wezeMpilo esifundazweni uDkt Sibongiseni Dhlomo. Ungqongqoshe uthe umsolwa ubesenxanxatheleni yezitolo e-Edendale ngesikhathi edubula omunye unesi wesilisa. Esitatimendeni uDhlomo uthe umsolwa ubalekile kodwa amaphoyisa amthola, wayokhomba isidumbu.
Uthe sekuyamkhathaza ukubulawa kwabasebenzi bezempilo ngenxa yokuhlukumezeka kwezothando. Ududuze umndeni kanesi nowabalimele. Kuthiwa umufi ubenezingane ezine emshadweni, okubalwa eneminyaka engu-21 nelishumi. UNkk Kheswa ubulawe ngendlela efanayo nekazakwabo uNkk Ntombizodwa Dlamini (40), owabulawa umyeni wakhe phambi kwabazali eMgungundlovu. Naye wayesebenza e-Edendale. NgoMashi nonyaka kwabulawa uNkk Barbara Haines (34), obengunesi esibhedlela eMahatma Ghandi. Kwasolwa umyeni wakhe, uMnuz Zane Smith naye ozidubulile. Ngawo uMashi kubulawe uNksz Mbalenhle Biyela (28), owadutshulwa emtholampilo e-Oakford, eVerulam.
Kubuye kwabulawa uNkk Zamadeyi Ngaleka (38), obeyi-financial officer esibhedlela eRietvlei eMzimkhulu. Naye wabulawa umyeni emzini wabo ePort Shepstone, izidumbu zabo zatholakala zinamanxeba okudutshulwa emotweni yabo.