KUVELA ukuthi iSilo samabandla wonke uMisuzulu kaZwelithini, sizishaye zaphelela ngoLwesine ekhweni laso, kwaMayisela.
Imithombo iveza ukuthi iSilo sithumele abakhongi ukuba bayolobola umama wamazinyane aso amabili uNksz Ntokozo Mayisela, ohlala eNewcastle.
Ngokomthombo osondelene nezingxoxo zamalobolo, abakhongi bahambise konke obekubizwe abakwaMayisela, waveza nokuthi sekusele ukuthi kukhongwe udwendwe. Uchaza umthombo uthe, abakwaMayisela babize izinkomo eziyisishagalombili nemali ewuR50 000.
“ISilo sizishaye zaphelela. Senze isiqiniseko sokuthi konke kuhamba ngendlela.”
Kuthunywa abakhongi nje, kusanda kubikwa ukuthi vele iSilo noMayisela sebelibophile ifindo lomshado ngokwasenkantolo. Kuthiwa babhala ngoLwesine ngesonto eledlule, ngaphambi kokuthi kutshwale iNdlovukazi Shiyiwe Mantfombi Dlamini, ozala iSilo.
Akukuningi okunye okwaziwayo ngobudlelwano beSilo noNksz Mayisela, njengoba abasendlunkulu beyikhulumela phansi indaba. Kepha omunye umthombo wasendlunkulu uthe kudala iSilo “siwa sivuka noNksz Mayisela”.
“Sashaya phansi ngonyawo iSilo, sathi sizomthatha kumnyama kubomvu uNksz Mayisela. Kwathi noma kukhona abagxekayo, sathi sisuka kude kabi noNksz Mayisela. Ngeke umenze lutho umuntu uma ezithandela umuntu wakhe, ” ngokusho komthombo.
Akucaci ukuthi zizowushaya nini kepha abaningi bakholwa ekutheni zizowushaya ngaphambi kokuthi iSilo sigcotshwe ngokomthetho. Imithombo yasendlunkulu iveze ukuthi njengoba seziphothuliwe izingxoxo zamalobolo, uNksz Mayisela usezobonakala eduze kweSilo.
Kubikwa nokuthi uNksz Mayisela angase ahambele umhlangano wasendlunkulu namhlanje. Amalungu asendlunkulu azokuba nomhlangano wokuqala namhlanje kusukela kwabekwa iSilo.
Imizamo yokuthola izimpendulo kundunankulu kaZulu, Inkosi Mangosuthu Buthelezi, ayizange iphumelele. Ihhovisi lakhe lathunyelelwa imibuzo ngezingxoxo zamalobolo ngoLwesibili. Nakuba leli hhovisi likuqinisekisile ukuthi liyitholile imibuzo, kepha kuze kwashaya isikhathi sokushicilela izimpendulo zingakabuyi.
NgoLwesibili uButhelezi utshele izintatheli ukuthi akazi ukuthi iSilo noNksz Mayisela sebeshadile. Phambilini kuke kwacatshangelwa ukuthi iSilo singase sigcagcelwe yinkosazana yamaMpondo uMntwana Wezizwe Sigcau, abanengane naye.