BATHI bazizwa engathi basebasha ogogo abaqhamuka emalokishini ehlukene abizwa nge-INK, ahlanganisa iNanda, Ntuzuma noMashu, njengoba bengaphansi kohlelo lokujima olubizwa ngeNqubeko Senior Citizens.
BATHI bazizwa engathi basebasha ogogo abaqhamuka emalokishini ehlukene abizwa nge-INK, ahlanganisa iNanda, Ntuzuma noMashu, njengoba bengaphansi kohlelo lokujima olubizwa ngeNqubeko Senior Citizens.
Labo gogo abaxhaswe yiKCap ngendawo yokujima, bathi kabasaxakwa nayizifo ezingamahlalakhona njengoba bejima izinsuku ezine ngesonto kule ndawo.
Bathe uhlelo abangaphansi kwalo lwaqala ngo-2016, futhi silokhu sinyuka isibalo sabo njengoba belokhu bememana ukuthi bazojima. Bathe sebengaphezu kuka-40 bebonke abangaphansi kwalolu hlelo.
Ukujima bathe kubenza bahlale benomdlandla kugweme nokuguga kubona futhi babuye bathole nethuba lokuqeqeshelwa ukulingisa imidlalo yeshashalazi kulesi sikhungo.
UNkk Thembisile Khoza (60) wakwa-F, eNtuzuma, uthe usehlala ezizwa ejabule ngenxa yokuthi uhlala ejima.
“Siza izinsuku ezine ngesonto eKCap ukuzojima ekuseni. Angisahlali ngikhathele njengoba bekwenzeka kudala. Indlela engizizwa ngiphila ngayo ingenza ngizizwe njengengane. Angisahlali nginesizungu njengakudala njengoba ngihlala ngijima,” kusho uNkk Khoza.
UNkk Nana Nzoyiya (61) wakwa-D KwaMashu, uthe bengogogo bathathe isinqumo sokuthi bashiye abazukulu bazojima.
“Okusijabulisayo ukuthi asigcini ngokujima kodwa sibuye sidlale nemidlalo esigcina sithokozile. Emva kokuzwa ngalolu hlelo ngamema abanye ogogo esisonta nabo ukuthi silujoyine futhi luyasisebenzela njengoba sesihlala sijabule,” usho kanje.
UNkk Siziwe Ngwane (69) wakwa-B KwaMashu, uthe abantu abamkholwa ukuthi unale minyaka ngendlela asebukeka emncane ngayo.
“Kwesinye isikhathi ngike ngijime ngokwehla ngenyuka izitebhisi ekhaya. Abantu baze babuze ukuthi kanti ngimngakanani ngendlela engisuke ngikhombisa ngayo umdlandla. Nakwami angiseyona into ehlala ilele nje kodwa ngiyakhwishiza,” kusho yena.
Omdala kunabo bonke bathe nguNkk Nana Mdima (80) obengafikanga izolo. Bathe uma engaqhamuka singadideka, sizitshele ukuthi kuseyintombazanyana ngendlela akhombisa ukuphila ngayo.
Bathe nabantu ababajimisayo babaphethe kahle futhi bayasebenza ngempela ngoba kubona abasakuthathi ngokuthi bajimisa abantu abadala, ngoba sebenomdlandla owenele ukumelana nazo zonke izitayela zokujima.
Imenenja yeKCap, uThobile Ximba, uthe ogogo babuye babaxhase ngokubaqeqesha ngokulingisa imidlalo yeshashalazi.