IZONDLALELWA yimbongi yaseMlaza, eNingizimu yeTheku, inkulumo kaMengameli wezwe, uMnuz Cyril Ramaphosa, ayibhekise esizweni, azoyethula eKapa, kusasa ebusuku.
Inqanawe Yangempela ogama lakhe lokuzalwa wuMsawenkosi Duma, uzobhulela uMengameli wezwe amazolo ngaphambi kwenkulumo yakhe elindwe yizakhamuzi ngabomvu.
Ekhuluma neSolezwe eseKapa, uNqanawe, uthe uswele amaphiko okundiza ukukhombisa ukuthi ujabule kangakanani ngengqayizivele yethuba alitholile.
“Lokhu kuyakhombisa ukuthi umsebenzi wobuciko engiwenzayo bakhona abawuthandayo nabawuhloniphayo, ngakho ngijabule kakhulu ngaleli thuba ngoba lizongivulela iminyango eminingi ngokuzayo,” kusho uNqanawe.
Le mbongi esibongele osaziwayo abaningi abanjengoDJ Hlo, umsakazi woKhozi FM uTshathugodo neSilo samaZulu uMisuzulu, ngama-video ewafaka ezinkundleni zokuxhumana, ithe impilo yayo ngeke iphinde ifane.
“Leli thuba lizoba yisiqalo sezinto ezinhle kimi ikakhulu ngoba sekukaningi ngingqongqoza eminyangweni eminingi kungahlangani,” kuphetha uNqanawe wodumo lwenkondllo ethi Gabi Gabi.