OSAZIWAYO bakuleli sebebhonge emswaneni ngokudlula emhlabeni kweNkosi uMangosuthu Buthelezi, odlule emhlabeni namuhlanje ekuseni.
Umculi kaMaskandi uKhuzani Mpungose ubhale ekhasini lakhe lika-Instagram. “Lasilahla icala Zulu, ewu. Kanti senzeni kwaze kwanzima phumula Shenge, phumula Mkhuzi wodlame obezifikela mathupha, okwenzele isizwe kubhaliwe emabhukwini omlando, uhambe kahle Sokalisa,” kubeka uKhuzani.
Umsakazi woKhozi FM owenza uhlelo lwantambama uKhathide Ngobe, odume ngoTshatha, uthe: “Uwile umuthi omkhulu KwaZulu, lala uphumule Shenge likhulu iqhaza olibambile ekuhlonishweni kombuso kaZulu noZulu Jikelele.”
UDJ Cndo uthe uwile umuthi omkhulu. “Engathi ungaphumula ngokuthula Babu Shenge, ngizwelana kakhulu nomndeni,” kusho uDJ Cndo.
UPhuzekhemisi Mnyandu uthe kubuhlungu kakhulu ngoba uMntwana wakwaPhindangene usize abantu abaningi. “Engathi angaphumula ngokuthula.”
UThokozani Langa uthe ngeke akwazi ukukhuluma okwamanje ngoba usangena khona kwaShenge kodwa ubezwakala ukuthi akamnandi emoyeni.