KUKHALWE kakhulu ngokulahleka kwesimilo kuvela umfana (17) ngamacala okunukubeza ubabekazi wakhe.
Kuthiwa umsolwa ubenukubeza ubabekazi wakhe oneminyaka engu-54 ubudala ngokocansi ephindelela endaweni yaseMolapomogale, eKameelpoort, eMpumalanga.
Umgilwa wuyena obikele amaphoyisa ngalokhu kuhlukumezeka kwakhe athi sekwenzeke kaningi phakathi kuka-Ephreli noSepthemba, nonyaka.
Kuthiwa umgilwa wayemtshela umsolwa ukuthi ayeke ukumhlukumeza kodwa kube nhlanga zimuka nomoya.
“Ngemuva kokuvulwa kwecala, kwajutshwa ithimba eliphenya amacala ohlame lwasekhaya, ukuvikeleka kwezingane namacala ocansi. Umsolwa waboshwa ngoLwesine olwedlule,” kusho uColonel Donald Mdhluli okhulumela amaphoyisa eMpumalanga.
NgoMsombuluko, umsolwa uvele phambi kweNkantolo yeMantshi yaseMbibana.