BONISWA MOHALE
LUYA kwiCommission for Conciliation, Mediation and Arbitration (CCMA) udaba lwabasebenzi abawu-27 beGautrain abamisiwe ngenxa yokuthi abafuni ukugomela iCovid-19.
LUYA kwiCommission for Conciliation, Mediation and Arbitration (CCMA) udaba lwabasebenzi abawu-27 beGautrain abamisiwe ngenxa yokuthi abafuni ukugomela iCovid-19.
Lezi zindaba zidalulwe yiNational Union of Metalworkwers of South Africa (Numsa) ngoMgqibelo.
INumsa izwakalise ukushaqeka ngokumiswa kwamalungu ayo awu-27 ngenxa yokuthi awayigomelanga iCovid-19.
Kuvela ukuthi iBombela Operating Company (BOC), ephethe iGautrain, yakwenza kwaba yimpoqo ukugomela iCovid-19 ngoFebhuwari 28.
INumsa ikhala ngokuthi ayizange yaziswe ngalokhu yize iyinyunyana eyaziwayo ukuthi imele abasebenzi beGautrain.
UNkk Phakamile Hlubi-Majola uthe sebelufake kwiCCMA udaba lokumiswa kwamalungu abo.
“Abasebenzi bazoqondiswa ubugwegwe ngoMashi 14 kuya ku-15. Udaba lokumiswa kwabo silufake kwiCCMA ngoMashi 2, sisalinde usuku lokulalelwa kwecala. Simangele ngesenzo seGautrain ngoba asikaze sitshelwe ngokuthi sekuyimpoqo ukugomela iCovid-19 kule nkampani. Asikhonjiswanga nocwaningo olwenziwe ngaphambi kokuthi kufinyelelwe kulesi sinqumo yingakho siya kwiCCMA,” kusho uNkk Hlubi-Majola.
Uthe iNumsa iyahambisana nohlelo lokugoma kodwa lokhu akusho ukuthi amalungelo abasebenzi abakhetha ukungagomi kufanele anyathelwe.
“Sifisa ukuxwayisa abaphathi beGautrain ukuthi amalungelo abasebenzi avikelekile kumthethosisekelo, lapho abantu benelungelo lokukhetha ukungagomi.Sizowalwela amalungu ethu akhetha ukungagomi. Izinkampani azikhumbule ukuthi ngaphambi kokuphoqa umgomo kunemithetho okufanele ziyilandele hhayi nje ukuthi zijahe ukuxosha abasebenzi,” kusho uNkk Hlubi-Majola.
Okwamanje uhulumeni akakakwenzi impoqo ukugomela iCovid-19 kodwa ngoJanuwari Isolezwe libike ngokuxoshwa kukaNksz Theresa Mulderij ngonyaka odlule emuva kokunqaba ukugomela iCovid-19.
Inkampani ayeyisebenzela yayikwenze kwaba yimpoqo ukugoma ikakhulukazi kubantu abaphumayo bakhulume namakhasimende njengaye.
ICCMA yavuna le nkampani kanti izinyunyana zasigxeka lesi sinqumo.
Phakathi kwezinyunyana ezingahambisani nokuxoshwa kwabasebenzi abangagomile kubalwa iNumsa, Saftu, Cosatu nePSA.
Inkampani yabaqashi, iNational Employers Association of South Africa (Neasa), nayo ayihambisani nokuthi umgomo weCovid-19 wenziwe impoqo.