SESIFINYELELE ku-21 isibalo sezidumbu zabasolwa ngokuba ngamaZamaZama emayini yaseKrugersdorp, eGauteng.
Izolo amaphoyisa akhiphe umbiko mayelana nezidumbu ezingu-19 ezitholakale emayini ebisetshenzwa ngokungemthetho kule ndawo.
“NgoNovemba 2, ngo-3 ntambama amaphoyisa abizelwe emayini eseKrugersdorp kutholakala izidumbu ezingu-19 zabavukuzi abasebenza ngokungemthetho.
“Uphenyo lokuqala luveza ukuthi lezi zidumbu zisuswe kwenye indawo zazobekwa lapha,” kusho amaphoyisa ngesitatimende.
Namuhla kuqinisekiswe ukutholakala kwezinye izidumbu ezimbili ngoLwesine ekuseni ngesikhathi amaphoyisa esebenza kule ndawo.
Lokhu kuqinisekiswe nguBrigadier Brenda Muridili, okhulumela amaphoyisa kulesi sifundazwe, othe lezi zidumbu zitholakale endaweni evulekile, amaphoyisa asaqhubeka nophenyo endaweni yesigameko.