AMAPHOYISA adubule abulala abasolwa abahlanu ku-Abbot Francis Road, eMarriannhill, namhlanje ntambama.
UColonel Robert Netshiunda okhulumela amaphoyisa KwaZulu Natal usiqinisekisile lesi sigameko. Uthe bebevele besezithendeni zabasolwa ngenxa yezigameko zobugebengu ebebezenza khona lapha eThekwini, emalokishini ahlukahlukene.
“Silunywe indlebe ngokuthi bakuphi laba basolwa, sithe uma sifika kubona sibakhomba eceleni, bona baphendula ngenganono, ilaphoke ozakwethu abaphendule khona, kwagcina ngokuthi abahlanu kubona basale enkundleni, kuchaza uColonel.
Uthe omunye wabasolwa ubevele esohlwini lwamaphoyisa njengoba ekade emfuna ngamacala okubulala abantu namanye okuhlukumeza. “Ubephinde athinteke lapho okwadutshulwa khona abantu eMarriannhill, Scrapyards nasekufeni kwabantu ababili ngoFebhuwari walo nyaka,”kucacisa uColonel.
UColonel uthe akumele nangephutha amaphoyisa afe uma ezivikela ezigebengwini, wathi asebenza ngokuzikhandla ukulwisana nezaphula mthetho.