ABHOKA ayakhahlela amaqembu aphikisayo ePhalamende ngekhefu elithathwe wuSomlomo wePhalamende onukelwa yijele ngezinsolo zokukhwabanisa nokushushumbisa imali.
Iyaqonga ingcindezi yokuthi uNkk Nosiviwe Mapisa-Nqakula ehle esikhundleni njengoba i-DA isiphakamise ukuthi akashiye emuva kokuba kugasele uphiko lwezokushushisa emzini wakhe oseBruma eGoli, luqoqa ubufakazi ngezinsolo abhekene nazo.
Ngemuva kokuhlaselwa ngabaphenyi, kube sekuvela amahlebezi okuthi isilungisiwe nencwadi egunyaza ukuboshwa kwakhe.
NgoLwesine ntambama, kuvele umbiko wokuthi uhoxile ohambweni lwethimba lasephalamende elibheke eGeneva eSwitzerland. Kubikwa ukuthi incwadi yokuthatha ikhefu lezinsukwana emsebenzini ukuze akwazi ukubhekana nodaba lwamacala anukwa ngawo.
Kuse ngoLwesihlanu kunamahlebezi wokuthi uzinikele emaphoyiseni asePitoli, lokhu kulandela ukubonakala kwezimoto ezimhlophe zimi esangweni lakwakhe ekuseni okuthiwa bezizomlanda.
Kuthe kusabhekwe lokho, kulindelwe nokuthi avele phambi kwenkantolo yeMantshi ePitoli, wadedela abammeli bakhe abaphuthume enkantolo enkulu yakuleli bayofuna isivimbelo sokuboshwa.
Ngokwamaphepha afakwe enkantolo, uMapisa-Nqakula ufake isicelo esiphuthumayo esibheke kwabahlanu ababaluliwe okubalwa ungqongqoshe wamaphoyisa, umphathi wezokushushisa nabanye. Le ncwadi iveza nokuthi uMapisa-Nqakula ufuna nokubona idokodo lamacala abekwa wona.
Kuqhubeka lokhu-nje iDA ithi iphini likasomlomo wephalamende lisamukele isicelo sabo sevoti lokungabethembi ubuholi bukasomlomo. USiviwe Gwarube uthe: “Akukho lokhu okwenziwe wusomlomo ngokuthatha ikhefu. Ngokomthetho wephalamende umuntu uthatha ikhefu ngokuvunyelwa yindlu yonke ngevoti.”
UGwarube uthe usomlomo bekumele asule esikhundleni ngoba isikhundla sakhe asifanelwe wukuphathwa wumuntu ongazithola esehlazweni elifana naleli.
Uthi banethemba lokuthi isicelo sabo sevoti lokungabethembi ubuholi bakhe, sizophumelela.