UGWETSHWE iminyaka emihlanu ebhadla ejele owayeyimeya kuMasipala waKwaZulu-Natal ngecala lenkohlakalo.
INkantolo yamacala athinta imali eThekwini izolo imgwebe iminyaka emihlanu uNomagugu Luzulane (49), owayeyimeya kuMasipala Ingwe osuwaziwa ngeDkt Nkosazana Dlamini Zuma.
OKlebe bathi ngo-Ephreli 2012 uLuzulane eseyimeya waqala uhlelo okwakuthiwa kuzosizwa ngalo imindeni edonsa kanzima emphakathini.
Kuthiwa wathenga ukudla wenza sengathi kuzoyiswa ebantwini abantulayo kanti uzokuyisa emngcwabeni womuntu ayekade esondelene naye.
Kuthiwa waphinda waqasha itende nomuntu owayezodlala ingoma emngcwabeni.
Okhulumela oKlebe KwaZulu-Natal, uLieutenant Colonel Simphiwe Mhlongo, uthe uLuzulane waqasha inkampani ephekayo wase eyikhokhela uR50 000, owabuye wanikezwa yena esandleni.
UMhlongo uthe lokhu kwalahlekisela umasipala imali enguR71 500.
“Kwabe sekuvulwa icala lokukhwabanisa nelenkohlakalo koKlebe eThekwini ukuze luphenyisiswe udaba. ULuzulane waboshwa ngo-2017, wase ededelwa ngebheyili. Uvele amahlandla amaningi enkantolo eyamlahla ngecala ngoJulayi 2023 njengoba eze wagwetshwa namuhla (esho izolo)” kusho uMhlongo.
ULuzulane ugwetshwe iminyaka eyisikhombisa ebhadla ejele emibii yalengiswa iminyaka eyisihlanu ngombandela wokuthi angalahlwa icala lokukhwabanisa nokweba ngalesikhathi.
UMhlongo uthe ubuye wagwetshwa eminye iminyaka emithathu ngamacala amathathu okuphula imigomo eyengamele ukuphathwa kwemali. Izigwebo zakhe kuthiwa uzozidonsa kanyekanye.
INhloko yoKlebe KwaZulu-Natal, uMajor General Lesetja Senona, income ithimba labaphenyi nelabashushisi ngomsebenzi eliwenzile oholele ekugwetshweni kukaLuzulane
“Lesi sigwebo sizosiza ukunqanda abasebenzi bakahulumeni abasebenzisa budlabha imali yabakhokhi bentela ukuzihlomulisa,” usho kanje.