INKAKHA yomlingisi ithi kube nzima ukuqhubeka nempilo ngemuva kokushonelwa ngumyeni obulawe yiCovid-19 emxine isikhashana.
UShona Ferguson, obengumlingisi futhi engumqondisi wemidlalo yeFerguson Films, ushone ngoJulayi 2021, esibhedlela ayelashwa kuso.
Inkosikazi yakhe, uConnie Ferguson, idalule okokuqala ngqa izolo esiteshini sezindaba zethelevishini, iNewzroom Africa (Channel 405) ngezigigaba edlule kuzo empilweni ngemuva kokushona komyeni wayo.
Uthe ukumbona efake uhlobo lwesifonyo esasehlukile kunezejwayelekile kwakungamphathi neze kahle ngoba kwakubukeka sengathi kwasona sasimhlukumeza, engakwazi kwakuphefumula.
"Ngangibuthaka kakhulu emoyeni. Ngangingasabuthi quthu ubuthongo. Nokudla kwakungasangeni nhlobo. Ngingumuntu ohlale, alale esibhedlela," kusho uConnie.
Uthe wayehluleka nawukukhuluma uShona ngoba wayefakwe isifonyo esehlukile. Ngosuku agcina ngalo ukumbona, uthe umyeni wakhe wakhuluma naye ngesandla, emtshela ukuthi uwubambo lwakho.
"Yize isimo sasisibi (kodwa) ngangingazitsheli ukuthi uNkulunkulu uzovivinya mina. Ngangithi uvivinya yena uqobo ukuze athi uma evuka ekuguleni kube nguye ofakaza ngobukhulu bakhe (uNkulunkulu). Ukungishiya kwakhe emhlabeni, kuseyinto engisazama ukuyamukela usuku nosuku. Izinsuku azifani ngoba kwesinye isikhathi ngizibona ngikwazi ukuqhubeka, kolunye usuku ngithole kunzima kakhulu," kusho umlingisi ongusomabhizinisi.
Eqhuba, uthe intshisekelo abenayo umyeni wakhe, yiyo emnika umfutho ekutheni aqhubeke ukulangazelela impumelelo nokuqhuba umsebenzi enkampanini yabo.
"Kusekuningi okungibhekile. Yize engasekho emhlabeni, kumele ngenze umsebenzi ongibhekile. Kwesinye isikhathi ngifikelwa wumuzwa wokuthi konke lokhu okwenzekile, kwenzeke ngesizathu," kubeka uConnie.
Uthe uShona wahlangana naye eminyakeni edlule ngesikhathi esengumphathi wezokuthengisa nezobuchwepheshe (IT) enkampanini ayeqashwe kuyo. Uthe yena ngaleso sikhathi wayesalingisa indawo kaKarabo emdlalweni iGenerations esibizwa ngeGenerations The Legacy.
Uthe umyeni wakhe wayezifela ngomkhakha wezokulingisa, wagcina eseyimenenja yakhe.
Ngokuhamba kwesikhathi uShona wangena ekulingiseni, base besungula inkampani yabo, iFerguson Films eqale ukukhiziqa iThe Wild elandelwe yiRockville neminye imidlalo ewuchungechunge abayikhiqizile.
Ukuqopha isiqephu sokugcina seThe Queen, okungomunye wemidlalo abayikhiqizile, uthe kube nzima ngoba ubengakaze azitshele ukuthi uyobe engasekho uShona uma usuphela.
Uveze ukuthi kube nzima ukuqedelela umsebenzi wokuqoshwa kweKings of Joburg kodwa kwaba nomuzwa owamfikela wokuthi makayiqedele iphrojekthi yalo mdlalo.
Kulindeleke ukuthi iqale ukukhonjiswa ngoJanuwari 27 kwiNetflix.
Uphethe ngokuthi njengamanje akasebenzi, lokhu ukusho ngohleko oluncane, kucaca ukuthi uyazintelela.