KUPHELILE ukuma kolayini abade kubantu baseNingizimu Afrika abasuke befuna ukuvuselela amalayisensi ezimoto njengoba iSouth African Post Office (Sapo) ithule uhlelo lokuwavuselela nge-internet.
Esikhundleni sokuyoma kulayini ePosini abantu bazokwazi ukuvuselela amalayisensi ezimoto ngokungena kwiwebsite ye-Sapo kumaselula abo noma kumakhompyutha, bathi https://www.sapomvl.co.za bese belandela imininingwane yokuvuselela ilayisensi.
Ngisho ukukhokha kwenziwa nge-internet. Uma ilayisensi isiyenziwe umuntu uyakwazi ukuyilanda ePosini noma alethelwe yona ekhaya.
Ayikho imali ethe xaxa ekhokhwa ngabantu abakhetha ukuvuselela ilayisensi nge-internet kodwa yilezo zindleko ezaziwayo zokuvuselela.
Uma isilungile ilayisensi umuntu oyivuselele nge-internet uzokwaziswa nge-SMS ukuthi ayilande nini.
UMnuz Johan Kruger okhulumela iSapo, uthe kuthatha izinsuku ezintathu ukuthi ilayisensi itholakale uma umuntu eyivuselele nge-internet, ezindaweni ezikude kuthatha izinsuku ezinhlanu.
Imali yokulethelwa ilayisensi ekhaya wu-R75 kodwa awukhokhi mali uma uzoyilanda ePosini.
UKruger uthe uhlelo lokuvuselela nge-internet luyingxenye yokuthuthukisa iPosi ukuze lihambisane nezikhathi zamanje.
Uveze ukuthi banohlelo olubizwa nge-SAPO in my Pocket oluhlose ukuletha izinsiza zePosi kubantu lapho bekhona.
Okwamanje uhlelo lokuvuselela ilayisensi yemoto nge-internet lutholakala yonke indawo ngaphandle kwezindawo eziseWestern Cape.
Abasathanda ukuya ePosini ukuvuselela ilayisensi yemoto bazoqhubeka bakwenze lokhu njengoba uKruger ethe uhlelo lwe-internet lwenzelwa labo abathanda ukusebenzisa ubuchwepheshe besimanje.
Abanezinkampani zokuthutha bayakwazi ukuvuselela amalayisensi ezimoto eziningi njengoba iPosi linohlelo lokubasiza.