USWELE amaphiko ukundiza uMbali Vibes, odle umhlanganiso emncintiswaneni wokuvumbulula oDJ besifazane abasafufusa, iSmirnoff Shayingoma Female DJ Search obuseGreyville, eThekwini, ngempelasonto.
UMbali (18) waseSoweto, igama lakhe langempela wuMbali Hlongwane, uthe ujabule kakhulu ngokunqoba umncintiswano obusubuya ihlandla lesibili. Uqale wanqotshwa wuRosetta Deep waseClermont ngo-2021.
“Bekuwuhambo olungelula obelunezinselelo eziningi, ikakhulu ngoba bekudingeka umuntu enze into ehlukile ezochaza amajaji nabathandi bomculo, ukuze aphumelele.
“Okunye okungijabulisa kakhulu wukuthi yimi omncane kubo bonke ebengiqhudelana nabo. Ngiswele amazwi okuchaza injabulo yami,” kuchaza uMbali Vibes.
Eqhuba, uthe ukudla umhlanganiso okuhambisana nesamba sikaR50 000 nohambo oluya eMiami, e-USA, kuzoyishintsha impilo yakhe, kuthuthukise ikhono lakhe lokuklweba amapuleti.
“Ngijabule kakhulu ngalokho ngoba kuzosho ukuqhubeka nokuthuthuka koDJ besifazane nabasebancane njengami, ikakhulu ngoba baseyindlala kakhulu kwezomculo.
“Sengikubheke ngabomvu ukusebenzisa ukunqoba kwami ukuzithuthukisa njengeciko, nokuthola isitayela somculo engifuna ukuwenza,” kusho uMbali Vibes owenza izifundo zeMarketing e-University of Johannesburg.
Ephetha, uthe maduze nje uzokhipha umculo omusha akholwa wukuthi abathandi bomculo bazowuthakasela.