SIYINDABA egudwini kumalungu omphakathi aseZiko, KwaMakhutha isenzo sowesifazane okuthiwa ugwaze wabulala umkhwenyana wakhe emva kwengxabano ngoMsombuluko ebusuku.
Isolezwe lithole ukuthi umsolwa uNksz Swazi Mshengu (24) uvuke umbhejazana wabulala uMnuz Sanele Cele (28).
Lesi sigameko sishiye amalungu omphakathi ethuthumela.
Umthombo osondelene nalaba ababili, uthe bese kuphele isikhathi eside bethandana kodwa umkhwenyana ulobole ngoMashi nonyaka.
Uqhube wathi kube nengxabano ebishunqa uthuli phakathi kwalaba ababili.
Uthe umkhwenyana ubesendlini yakhe aqashe kuyona KwaMakhutha ngesikhathi exabana ocingweni nengoduso yakhe uNksz Mshengu obekubo eBergville.
Kuvela ukuthi umufi udabuka ePort Shepstone.
"Baxabane le nto exakayo ocingweni. Kodwa sonke asazi ukuthi ingxabano ibimayelana nani," kuchaza umthombo.
Uthe owesifazane ugibele ngalo usuku lwengxabano esuka eBergville waze wafika ntambama emqashweni kamufi oKwaMakhutha.
"Umfice ezihlalele eziphuzela nabangani bakhe. Sengathi umcelile ukuthi bahambe bayoxoxa ngaphakathi endlini. Ngempela bahambile baya endlini," usho kanjena.
Uthe sebesendlini umakoti kuthiwa udonse ummese obusendlini wangachitha sikhathi wavele wamgwaza inxeba elilodwa enhliziyweni.
Kuthiwa ngemuva kwalokho umphuthumise esibhedlela nokuyilapho ethulele khona.
Ummese kuthiwa uwufihlile endlini wagcina ungatholakalanga.
Uthe esibhedlela kufike amaphoyisa akuyona le ndawo ambopha owesifazane naye wavuma ukuthi umgwazile.
Isolezwe likhulume noNksz Sihle Cele oyisihlobo sikamufi othe umufi ubenguthisha esikoleni iNyonemhlophe Secondary, eMbumbulu.
Uthe nomsolwa ubesanda kuphothula iziqu zakhe zobuthishela.
Udalule ukuthi umsolwa ubengaqondakali ukuthi uwuhlobo luni lukapende.
Abanye uthe bebemazi njengengelosi, abanye uthe bebemazi njengowesifazane ongalungile.
"Ngeke uze umqonde ukuthi ubengumuntu onjani. Abantu bebekhuluma izinto ezehlukene ngaye," usho kanjena.
Ugcizelele ukuthi kodwa bona bebazi ukuthi konke kuhamba kahle phakathi kwalaba ababili.
UMnuz Njabulo Cele ongumfowabo omdala kamufi, uthe umsolwa bekungowesifazane oluhlaza obekulukhuni nokuthi baxhumane naye.
Uveze ukuthi batholana eNyuvesi yaKwaZulu-Natal lapho bebenza khona iziqu zobuthishela.
Okhulumela amaphoyisa KwaZulu Natal uColonel Robert Netshiunda usiqinisekisile isigameko.
Uthe kusolakala ukuthi owesilisa oneminyaka engu-28 ugwazwe wabulawa ngowesifazane abethandana naye oneminyaka engu-24.
“Kusolakala ukuthi umbulale ngokumgwaza ngemuva kwengxabano okuthiwa babe nayo,’’ usho kanjena.
Umsolwa kuthiwa uvelile eNkantolo yaseMbumbulu ngoLwesibili. Icala lahlehliswa.