KHETHA SANGWENI
UZOFUNGISWA njengekhansela kuMasipala weTheku uMnuz Zwakele Mncwango osanda kuqokelwa kwesikaSihlalo we-Action SA KwaZulu-Natal. USihlalo we-Action SA kuzwelonke, uMnuz Michael Beaumont, uthe babona isimo sezinkinga zengqalasizinda ezihlasele iTheku, abakholwa wukuthi uMncwango unaso isipiliyoni sokuzisukumela.
UMncwango uyongena njengekhansela emkhandlwini weTheku, uzobe ekhuza ibuya ngoba wayehola ikhokhasi ye-DA kudala. UMncwango ushiye i-DA abengusotswebhu wayo eSishayamthetho KwaZulu-Natal, wajoyina i-Action SA ebingenaye umholi esifundazweni.
izindaba zokungena kukaMncwango emkhandlwini ziqinisekiswe nawuyena uqobo esabalalisa isaziso esivela eqenjini lakhe, limemezela ukuthi uyolimela kumasipala. Kwenzeka lokhu nje uMncwango usanda kufaka uMasipala weTheku enkantolo, ekhala ngokuthi kawulusukumeli udaba lwendle egeleza ezindaweni eziningi.