AZOGWETSHWA ngo-Agasti nonyaka amadoda amabili abesebenzela uMasipala wesiFunda iHarry Gwala, alahlwe ngamacala enkohlakalo yokuholela izipoki.
UMasipala wesiFunda iHarry Gwala uzinze e-Ixopo kanti ubuswa yi-ANC esiwuphathe isikhathi eside.
Kuthiwa ibalelwa kuR733 700 imali okuthiwa yadliwa ngohlelo lokuholela izipoki.
UThamsanqa Mazibuko (53), ulahlwe amacala okukhwabanisa angu-224 kanti uThembinkosi Mswazi (56) walahlwa amacala angu-25 okukhwabanisa.
Bebevele eNkantolo yamaCala eMali lapho begcine bewavuma khona amacala abebebekwe wona yinkantolo, ebalahle ngawo wonke.
Bobabili baboshwa emuva kwecala elavulwa ngo-2017 e-Ixopo lase lidluliselwa ethimbeni loKlebe elimuke nalo uthuli laze labagojela.
Laba bobabili bebengaphandle ngebheyili abayithola emuva kokuthi beboshiwe ngo-2017.
Isolezwe Ngempelasonto lithole ukuthi umkhuba wokuholela izipoki udla lubi komasipala.
Kuthiwa kufakwa imininingwane ohlwini lwabaholayo kube sengathi abanye babasebenzi uma sekuphuma imali, idliwe ngabathile.
Ibamba loMkhulumeli woKlebe KwaZulu-Natal, uWarrant Officer Sibu Ncane, uthe kube yintokozo ukuthi baluphothule lolu daba.
Uthe lokhu kube wumsebenzi woKlebe abasebenzise ubuchule babo ukulandela lolu daba baze babagojela abamangalelwa.