BANGASE bazithole beklomeliseka, bakwazi ukuhambela imicimbi, bathamele nemidlalo ezinkundleni abantu bakuleli abakhetha ukugomela ubhubhane iCovid 19.
Lokhu kusikazwe wuNgqongqoshe wezeMpilo kuleli uDkt Joe Phaahla ngoLwesihlanu ngesikhathi ekhuluma nabezindaba esesibhedlela iChris Hani Baragwanath, eSoweto.
Ngalokho uthe akaqondile ukwenza umgomo ube yimpoqo kodwa uhlose ukukhuthaza ukugoma.
"Esikuzamayo yimihlomulo. Abantu balambele ezokungcebeleka, amadili omculo, ukuyobukela ibhola e-Orlando Stadium. Ngokuqinisekisa ukuthi ugonyiwe, sesingaqala sivule izindawo eziningi bese sithì uma begomile abantu abaningi sebengaya enkundleni ukuyobuka umdlalo webhola. Uma nigomile, abantu abaningi bangathutheleka eNewtown bayothamela idili lomculo." Uthe kunohlelo abaludingida noNgqongqoshe wezeMidlalo, ezobuCiko namaSiko, uMnuz Nathi Mthethwa, okuhloswe ngalo ukuhlomulisa abantu asebegomile.
UPhaahla uthe umnyango wakhe uhlongoza ukuba izwe lisuswe esigabeni sesithathu ngesonto elizayo. Uthe okumenza abe naleso siphakamiso wukubona ukwehla kwezinga lesiwombe sesithathu seCovid-19 ezifundazweni eziningi.
"Sinethemba lokuthi naKwaZulu-Natal lizokwehla bese nase-Eastern Cape kube nozinzo. Sizohambisa umbiko kumengameli wezwe ngesonto elizayo futhi uma kucaca ukuthi sekunozinzo, sizobe sesinikezela ngezeluleko." Uthe uhulumeni ukhathazekile ngokuqiniswa kwemithetho kodwa ngakolunye uhlangothi kufanele kuphephiswe impilo nemisebenzi yabantu.