AMAPHOYISA anxusa umphakathi ukuba ulekelele ngemininingwane engasiza kutholakale owesilisa osolwa ngecala lokufa kwentombi yakhe.
Kuthiwa ngomhla ka 8 Septhemba, uPhumlani Mthembu (41) washayela udadewabo ucingo emazisa ukuthi ubulale intombi yakhe futhi usendleleni ebheke ePort Dunford.
Kwabikelwa amaphoyisa aseSikhaleni ukuba aphuthume eMzingwenya Reserve.
“Amaphoyisa afika kule ndawo athola isidumbu sikaNokubonga Nomkhosi Zungu (35) kwelinye lamakotishi. Isidumbu sikaNokubonga satholakala embhedini sinqunywe uqhoqhoqho ummese ushiywe eduze kwekhanda lakhe,” kusho uLieutenant Colonel Nqobile Gwala.
Kuphenywa icala lokubulala kanti amaphoyisa asekhiphe incwadi egunyaza ukuboshwa komsolwa ongaziwa ukuthi ukuphi njengamanje.
UGwala uthe amaphoyisa acela umphakathi ulekelele kutholwe uPhumlani Mthembu, onolwazi ngaye angathinta iphoyisa eliphenyayo uDetective Sergeant Sifiso Sabela ku-082 557 0712/ 035 796 8027 noma iCrime Stop ku-08600 10111.