IBANDLA lamaNazaretha ohlangothini lwaseBuhleni, libuthane Esangweni Temple, ngaseMega City, eMlaza, izolo, ukuzokhulekelwa izinkinga nabo bonke ubunzima bempilo obubheke nabantu baseNingizimu Afrika.
Ngokusho kukaMnuz Mncedisi Jeza wethempeli iHlakaniphani, nabo abebekhona kulo mkhuleko, kuwumkhuba wabo waminyaka yonke, ukuhlangana kuleli thempeli bezokhuleka - bese begida njengenhlalayenza.
“Njalo ngoFebhuwari iNkosi yethu uNyazilwezulu namaNazaretha onkana, sihlanganela kuleli thempeli ngenhloso yokukhuleka bese kugidwa usuku lonke.
“Akusiyo inkonzo enombandela nemicikilisho etheni, kodwa yindlela yokuba ndawonye ngokwezinhlelo zebandla zaminyaka yonke - ukuhlangana, sikhulekele izinkinga nakho konke okubi esibhekene nako,” kuchaza uJeza.
UNyazilwezulu bekulindeleke ukuthi lukhulume nabebandla uma sekuqedwe umgido, ngaphambi kokuphindela emzini walo oseBuhleni, eNanda.