ABAKHULELE emakhaya bayazi ukuthi kuvamile ukuthi kuthiwe ukudla akuchithwa, kangangokuthi abazali baqinisa isandla ekutheni akukho ukudla okuzophekwa kungaphelile lokho okusuke kukhona, ngisho noma sekuqala ukonakala.
Uthi uvuka ekuseni, ufudumeze ukudla kwakho, uvalele esiswini - kube ngesifanayo futhi uma sesibuya esikoleni uma kusalile ekuseni.
Lolu hlobo lokudla luze lubizwe ngegama kuthiwe wumfudumezo, futhi lwalehla esiphundu, sidle sishaye esentwala kungabi ndaba zalutho.
Ungoti endleleni yokudla, uNksz Thabitha Makgato waseThekwini, uthe nakuba umfudumezo ungenawo umthelela omubi emzimbeni womuntu kodwa kunezinto umuntu okumele aziqaphele ngawo ukuze ungamdaleli inkinga esiswini nasemzimbeni.
“Ukuthatha ukudla okupheke ngayizolo noma kuthangi ukufudumeze bese uyakudla akunankinga kodwa kumele uqaphele ukungakudli ekuseni ngoba abezempilo abakukhuthazi ukuqala usuku ngokudla okuqinile ikakhulu okulalile ngoba kuphazamisa indlela yokugayeka kokudla esiswini,” usho kanje.
Ucebise ngokuthi uma umuntu efuna ukufudumeza ukudla okuphekwe ngayizolo noma kuthangi, akaphake okulingene azokudla kuphela kube yikhona akufudumezayo, hhayi ukufudumeza konke ukudla okusemabhodweni ebe engezukudlaakuqede.
Uthi ukulokhu ukufudumeza kaningi kunobungozi emzimbeni womuntu.
“Akumele uthathe ukudla osuke wakufudumeza, uphinde ukufake efrijini bese ukufudumeza okwesibili ngesinye isikhathi. Okungcono ongakwenza wukuthi ufudumeze lokho okulingene ukukudla ngaleso sikhathi kuphela.
“Uma ukudla kungakonakali nje, ungakudla kungakhathelekile ukuthi ubukupheke nini, kudingeka nje ukuthi ukugcine efrijini ukuze ukubeke kahle,” kusho uNksz Makgato.
Okhulumela i-Association for Dietetics in South Africa (ADSA), uNksz Jandri Barnard weluleke abantu ukuthi bagcine ngendlela ephephile ukudla futhi ezokwenza kungonakali emafrijni, nokuthi okungcono wukuthi umuntu apheke ukudla okulingene nazokudla kuphele ngosuku ukugwema ukukubeka isikhathi.
“Qala ngokupholisa ukudla kwakho ngaphambi kokufaka efrijini. Uma ukufudumeza qikelela ukuthi kushisa ngokwanele ukubulala amagciwane ahlala kukho. Okunye abantu okumele bakugweme wukufudumeza ukudla kaningi ngoba lokho kungenza kungabe kusaba sesimweni esihle, futhi kwandise amagciwane ahlala ekudleni,” kucebisa uNksz Barnard.
Ucebise ukuthi ukudla okufana nesitshulu, yisishebo nesobho kungcono uqale ukukhiphe amaqhwa ngaphambi kokufudumeza, wase exwayisa abanezifo ezinjengegciwane lesandulela ngculazi nomdlavuza ukuqaphela ukudla okufudumeziwe ngoba kungenza kube lula kubona ukungenwa yizifo ezifana nohudo nesicanucanu.
