SEKUWUMLANDO ukuthi ngesizini edlule ka-2021/2022 iMamelodi Sundowns, inqobe zonke izicoco eziningi kunamanye amaqembu kuleli. Lokhu kuphosa inselelo kwamanye amaqembu anezinkumbi zabalandeli njenge-Orlando Pirates, neKaizer Chiefs ukuthi avuke azithathe.
Nakule sizini kubukeka kukuncane okungayivimba ekunqobeni isicoco sePremiership okwehlandla lesithupha amasizini elandelana, okuyinkomba yokungabi nantanga njengamanje.
Uma kuqhubeka kanje le ligi ehlonishwayo iyogcina intula abalandeli abazoya enkundleni, ilahlekelwe ngabaxhasi ngoba abekho abathokozela ukutshala imali yabo emaqenjini angawini izicoco.
Lokhu kuwubufakazi bokwehla kwezinga lebhola eNingizimu Afrika, okufakazelwa nawukwehluleka kweqembu lesizwe iBafana Bafana, ukuzibekisela indawo emiqhudelwaneni yamazwe, enjenge-Africa Cup of Nations, neWorld Cup.
Kuyaziwa ukuthi eminyakeni edlule ibhola lezikole yilona ebeliwumthombo wokukhiqiza abadlali abanekhono futhi namaqembu ebhola elikhokhelayo akuleli abezingela ezikoleni ukuthola abadlali abasezingeni.
Abadlali abanjengoDoctor Khumalo, Helman Mkhalele abanqoba i-Afcon neBafana Bafana ngo-1996, uPercy Tau ogijima kwi-Al Ahly yase-Egypt, ukubala abambalwa, bangabanye abakhiqizwe yibhola lezikole.
Nokho, lokhu akusenzeki futhi kalisekholi isasasa ebholeni lezikole njengakuqala. Nayo iSundowns iyogcina ingasabatholi abadlali abanohlonze, ithembele kubadlali bangaphandle kuphela, okuyinto engalibulala iliqede ibhola lethu.
Lokho-ke kuphonsela inselelo iSafa ekuqiniseni ibhola lezikole nelezinhlaka ezingaphansi kwayo ukuze kutholakale abadlali abanohlonze nokuyibona abazokwenza iligi yePremier Soccer League ibuyele ezingeni eyayikulo, kuphele ukukhonya kweqembu elilodwa.
Believe it or Not. Fact 🤞
— Jabu Mahlangu (@JabuMahlangu12) January 23, 2023
What's your take football lovers? pic.twitter.com/xcY6HazjnS