UHLOKOLOZE iziqandu encoma ukukhula ngamandla kwendodana yakhe encane uPrince Kay Bee, ezinkundleni zokuxhumana, njengoba abantu bekhala ngokuthi akayinakile indodana yakhe endala.
Lo DJ ufake umyalezo ekhasini lakhe kwiTwitter, encoma indodana yakhe enonyaka, ethi kuyamumangaza ukuyibona isigaqa ngamadolo, ekubeni ingakaze ihubuluze nangesisu izama ukugaqa.
Ugxekwe ngabantu abebembuza ukuthi kungani engayinaki indodana yakhe endala yaseVenda njengoba encoma intandokazi yakhe encane.
Yize kukhona abalandeli bakhe abebejabula naye, abanye bazwakalise ukungaphatheki kahle uma bezwa ukuthi ukhetha iphela emasini ezinganeni zakhe.
Ingane encane kaPrince Kay Bee uyithole noZola Zeelovin.
UPatience (not Ozwokor) ephawula, uthe: "Uyazi ukuthi ayilungile le nto yokunaka ingane eyodwa, ekubeni kuneyaseVenda ongendaba nayo?’’
UJakes yena uthe uyakhumbula ukuthi uKay Bee akakaze abe nabo ubudlelwano obuhle noyise.
"Ukuzwa le eyokuthi akayinakile ingane yakhe eyodwa, kuyangidabukisa. Indlela ezozizwa ngayo ingane yakhe, izofana nse nendlela yena azizwa ngayo ngoyise. Ingane izobona ukuthi umfowabo nguye obeyintandokazi kuyise."
Imizamo yokuthola uPrince Kay Bee ayiphumelelanga, ucingo lwakhe belukhomba ukuthi ukolunye ucingo ngesikhathi ethintwa.
Umyalezo athunyelwe wona kuze kwashaya isikhathi sokushicilela engawuphenduli.