UQINISILE owathi ungayikhipha inkawu ehlathini kodwa awusoze walikhipha ihlathi enkawini. Ubuqaba bani nje lobu obenziwe nguSiyabonga "Big Zulu" Nene kumaMetro FM Music Awards eMbombela Stadium, eMpumalanga ngoMgqibelo owedlule. Akekho obengaboni ukuthi ugqoke ijakhethi yesikhumba iKurt Geiger ebiza uR14 000 namangquphane. Ngakho besingekho nje isidingo sokungalikhiphi inani. Lokho engakwenza eBergville uma eya odwendweni nakodede hhayi emcimbini onathi basemadolobheni. Zikhona vele ezinye izinyoni ezingamlingisa ngoba amabhinca abuye afane nezinyengelezi. AbamaMetro abosixwayisa ngelinye ilanga uma kuzofika namabhinca ukuze singashaqeki uma esevukwa ubumpatha. Manje zithini ngesisu sikaLwah Ndlunkulu. Ngabe uBig Zulu usewu-Arthur Mafokate omusha?
