ISIZULU sithi ziyohamba izinsizwa, kusale izibongo okuyizo eziyozikhulumela emanxiweni. Lesi saga siyafakazeleka ngengwazi yomculo we-jazz, uSipho Gumede.
Izolo (ngoLwesihlanu) bekuphela iminyaka ewu-20 uGumede adlula emhlabeni njengoba ashona zingu-26 Julayi 2004 esibhedlela saseThekwini kodwa namanje akakalibaleki ezingqondweni zabathandi bolozolo lomculo.
Indodakazi kaGumede, uMantombi (okunengoma eshisa izikhotha eyaqanjwa nguGumede ngaye), uthe yize sekuphele leminyaka kodwa kungathi le ngqalabutho isanda kudlula emhlabeni. “Sikhumbula izikhathi ezimnandi esazichitha naye.” UMantombi uthe njengamanje bahlela ukwenza umcimbi wesikhumbuzo sikaGumede eBat Centre. “Siyonazisa ngosuku lwalo mcimbi,” kuphetha uMantombi. Kulo nyaka ngabe uGumede ubehlanganisa iminyaka engu-72 azalwa njengoba abona ilanga ngo-Ephreli 17, 1952. Khonamanjalo, owasebenza kakhulu nomufi, uBongani Nkwanyana wodumo kwiStax, uthe uGumede uyohlale esezingqondweni zabo.
Lo mdlali wesigingci sebhesi waKwaMashu akwenzeki nangephutha angabakhumbuzi abathandi bomculo ukuthi waphekwa wubani.
Ngakho abazohambela idili lomculo ongasoze wabuna, iLive Jazz On A Sunday eGagasini Seafood and Grill, eThekwini ngeSonto ngo-2 emini, bazoba nengqayizivele yethuba lokuzibonela mathupha uNkwanyana eqhulula amanye amanoni eqhawe lakhe.
UNkwanyana uthe emanonini kaGumede azowacaphuna kubalwa elithi Faces and Places, Down South, When Days Are Dark Friends Are Few, Mantombi nelithi Alone In A Strange Place.
Uthe ngeke agcine ngezikaGumede kuphela kodwa nezakhe uzozidlala.
"Bazozwa izingoma ezintsha esengizibhalile ngibophele ibhendi ebumbene enabadlali bezinsimbi abalishumi. Ngizobuye ngibadlalele nesazenza kwiStax esingaziqophanga. Kuzobe kuyi-Afro jazz emnandi engizoyifaka kwi-albhamu engizoyiqopha."
Ezingomeni zakhe azozididiyela esteji, uNkwanyana uthe izithameli kuzofanele zilindele amanoni athi Namisa, Azotha, Ngashel' Intombi nelithi Dlala Sbali.
Kulo mcimbi le nkakha izobe ishiyelana inkundla noDJ Muntu "Master Blaster" Khoza noDJ Thabo kanti kungenwa emnyango ngoR100.
