INTOKAZI yakuleli engene yezwakala endimeni yomculo, u-Elaine, ingelinye lamaciko asemasha endimeni yomculo eliqokwe emcimbini wezindondo wase-USA, amaBET Awards.
U-Elaine, ezwenikazi lase-Afrika, uqokwe emkhakheni weThe Viewer’s Choice: Best New International Act nentokazi yaseNigeria, uTems, nokuyibona bobabili abamele i-Afrika kulo mkhakha.
UMonde Twala wakwaViacom uveze ukuthi kuyabajabulisa ukuqhubeka nokuqokwa kwabaculi base-Afrika abakade bafika kulo mkhakha nabasha njengoba kucaca ukuthi umculo wabo unakiwe nakwamanye amazwe.
“Umkhakha weThe Viewer’s Choice: Best New International Act wakhelwa ukuhlonipha abaculi abasanda kufika kulo mkhakha nabangene kuwona kwezwakala futhi abenza kahle kuwona. Okunye ngawo ubheka ukuthi umculo wakho uhambe kangakanani kwamanye amazwe nokuyingakho kubonakala laba baculi kuwona, ” kusho uMonde.
Uthe kuyajabulisa nokubona lonke uhlu lwabaculi abazohlonishwa kulo mcimbi njengoba benze kahle kakhulu ezingomeni zabo abaqokwe ngazo kulo mcimbi kanjalo nama-albhamu abo.
U-Elaine ubonge abalandeli bakhe noNkulunkulu ngokuqokwa kulo mcimbi, wathi uyohlale ebathanda ngenxa yento abemenzele yona.
Ukuvotela lo mkhakha kuqale ukuvulwa ngoMsombuluko, kuyoze kuvalwe ngoLwesihlanu ngo- 4 ntambama.
Abanye abaculi abaqokwe kulo mcimbi base-Afrika baqokelwe emkhakheni weBest International Act nguBurna Boy waseNigeria, Diamond Platnumz waseTanzania noWizkid waseNigeria.
Lo mcimbi uzosakazwa bukhoma ngoJuni 28 kuBET Africa (DStv channel 129) ngo-2h00 ezintatha.