INGUCHITHI saka imicimbi ngale mpelasonto ezindaweni ezihlukene zaKwaZulu-Natal. Ubumnandi buqala ngeBhekizizwe Joseph Shabalala Marathon Celebration & Music Festival, eLadysmith Indoor Centre, eMnambithi kusukela ngo-12 emini.
Emcimbini kuzobe kunandisa iLadysmth Black Mambazo, Sjava, Khuzani, Thinah Zungu, Menzi, Amageza Amahle, King Masolution, Lwah Ndlunkulu, Costah Dollah, Jeremy Olivier nabanye. Uhlelo luzobe luphethwe ngumsakazi woKhozi FM, uZimdollar Biyela noweMvula FM, uModelkazi Dlamini.
Namhlanje kuzohlonishwa iqembu lesicathamiya, iHlanganani (elibophele uShwi noMtekhala), kumaSIP Isicathamiya Awards, eStable Theatre, eThekwini kusukela ngo-10 namhlanje. Kuzodela umakhasana ozozibona zihlabana amalunda bukhoma emunxeni weBest Live Perfomance phakathi kweRoyal Messengers, Bergville Green Lovers, Nombika Black Boys, Ndwedwe Perfect Boys, Khalabhayi Boys, Highlands Vela Boys, NMZ Power Boys, Colenso Democracy, Hlanganani, Isikhalo Se-Afrika neXolo Home Boys.
NaseNkanini Sports Complex eMzumbe, zizobe ziwa ziphohloka kwiHandover and Music Concert phakathi kuka-6 no-11 ebusuku. Kuleli dili kuboshelwe uPhuzekhemisi, Bahubhe, Ithwasa Lekhansela, Mjolisi, Phindi P, Shwi Mantombazane, DJ Happy Gal nabanye. Abaphathi bohlelo kuzobe kuwuSimphiwe Majozi onguSbu kuZalo, abasakazi boKhozi FM uZama Mseleku, Zimdollar noNolwazi Machi noweGagasi FM uSimtho Dladla. Kusukela ngo-11 ebusuku kuze kuyosa emnyango kuzobe kuqhudelana amaqembu esicathamiya.
Khona namhlanje kusukela ngo-6 ntambama zizobe ziphenduka kwiMthayi After Party eKosi Bay Hippo Lodge& Resort, KwaNgwanase. Kuzobe kushiyelana inkundla uBig Zulu, Khuzani, DJ Cndo, Big NUZ, DJ Bongz, Jumbo, DJ Wobbly, Dlala Thukzin, Josiah De Desciple.
Kusasa abathandi bomculo ongasoze wabuna bazobe bezitika kwiMthayi Marula Festival Sunday Soul Session, eNdumu River Lodge, KwaMhlabuyalingana njengoba kuzobe kunandisa abasakazi beMetro FM uPaul Mtirara, Bambo Johnson, Msizi Shembe, Sjava, Stokies, DJ Muntu, DJ Nzwiri nabanye.