KUKHALWA zinkalo zonke ngokudlula emhlabeni komculi wombhaqanga wodumo koFeleba, uKhumbulani "Khathide" Kubheka.
Umfo kaKubheka odume kakhulu ngokugidela uBhekumuzi Luthuli noThokozani "Somnandi" Langa, ushone ekuseni ngoLwesibili esesibhedlela eNgwelezane eMpangeni.
Omunye wabasebenze kakhulu noKhathide kuBhekumuzi nakoFeleba, uXolani "Usxubhosamantombazane" Mkhize, uthe umufi uqale ukuhlaselwa wukugula ngeSonto.
"Kuvele kwafaseka yonke into kwesingezansi maqede wangabe esakhuluma. Bamphuthumise kwesinye isibhedlela KwaZulu kodwa naso samdlulisela eNgwelezane lapho eshone ekhona," kusho uXolani waBafana BakaMolo Bangempela. Esephetha uXolani uthe ilanga libashonele emini ngoKhathide.
USomnandi ukuqinisekisile ukushona kwalo mculi waseMangwaneni, eBergville.
"Hheyi! Asazi ukuthi sithini. Sidumele kakhulu. Yilokho okwamanje okusishaqisile. Kunzima ukulahlekelwa yinkabi ebesilazi ijoka obewudonsa ngalo," kuphetha uSomnandi.
UKhathide wasungula oFeleba nomufi uMduduzi Mlangeni futhi ubexavatha ama-keyboard kuleli qembu kodwa bese liholwa wuNqobani Dube.
UKhathide ushona nje bekungakapheli nonyaka umculo wombhaqanga ushiywe wuMbongeni Ngema, Bhekezakhe Mthembu waBakhwenyana noScelo Ndlela weSoul Brothers.
Nabanye abaculi bombhaqanga nabakamaskandi basine bededelana bekhala ngokudlula emhlabeni kwaleli qhawe.