UMCULI waseBergville, uJabulani "Sjava" Hadebe ungomunye wabaculi bakuleli abazobhulela amazolo ingwazi yaphesheya kwezilwandle, uFreddie Jackson ochungechungeni lwamakhonsathi akhe aseNingizimu Afrika ngenyanga ezayo.
KwiYou Are My Lady South Africa Tour, uSjava uzoshiyelana inkundla noZonke Dikana, Mashaba, Ismail Abraham's noDJ Young. USjava uthe igcagcele esokeni kuye ngoba ukhule elalela umculo kaFreddie futhi akakaze waziphupha esina ededelana naye esteji.
"Ngesikhathi ngimenywa ukuba ngizobamba iqhaza kulo mcimbi, beyingekho indlela yokuthi ngithi cha. Ukuba nje sesteji esisodwa nale nkakha futhi ngiyizwisa umculo waseNingizimu Afrika, yingqayizivele yethuba lelo," kusho uSjava wodumo kwiZone 14, eHostela nakuShaka Ilembe, okuyimidlalo abuye wavelela kuyo.
NoZonke akawuvali umlomo ngethuba anikezwe lona. Uthe leli yiphupho lanoma yimuphi umculi osafufusa. "Sengikujahe kabi ukuba nesikhathi esimnandi nabalandeli bami futhi ngibathembisa ubumnandi abangasoze babulibala," kusho uZonke odume ngengoma ethi Feelings, Viva The Legend nethi Jik'izinto.
UFreddie Jackson uzoqala ukunandisa eSun City Superbowl eNorth West, ngoSepthemba 23 no-24, aye e-Emperors Palace eKempton Park ngoSepthemba 30 naseNkosi Albert Luthuli ICC eThekwini ngo-Okthoba 1.
Omunye wabagqugquzeli bomcimbi, uThulani Maphumulo uthe amathikithi adayisa okwamagwinya ashisayo eTicketpro, PayZone nasezitolo zaseSpar ngemali ephakathi kukaR450 kuya ku-R1 150.