ISIHLOKO: The Underrated King
UMCULI: Heavy K
UHLOBO: Ama-piano ne-house music
UMHLAZIYI: CHARLES KHUZWAYO
UMKHULULI "Heavy K" Siqula ngomunye woDJ bakuleli abake bashisa izikhotha. Le nsizwa edabuka eGqeberha,e-Eastern Cape ike yavelela ngenoni elalithi Beautiful War, Inde, Sweetie nelithi Easy To Love.
Sithe sisajabulela umculo wakhe, wavele wanyamalala uHeavy K njengoba esekhuza ibuya ngaleli cwecwe elifinyeziwe, oluwuhlobo lwe-Extended Play (EP) elithi The Underrated King.
Engikuphawulile wukuthi kulokhu ubuye ngesigqi sama-piano. Ubophele uYallunder noJNR SA engomeni ethi Ekhaya, uMashudu kwethi Bambezela, u-Aymos, Caiiro noNdoni kwethi Jabula, uBailey noJNR kwethi Dakiwe, uProfessor noMeez kwethi AmaMiliyoni, uStonebwoy kwethi Hold On noNdoni kwethi Phakeme.
Okunye engikuqaphelile ukuthi uma isaqala lengoma ethi Ekhaya, kuba sengathi uzozwa iphimbo likaBucie lithi Easy To Love.
Ngale-EP, uHeavy K ukhombisile ukuthi kungani ezibiza ngengonyama ebukeleka phansi.
Nakuba ebesezwa amanzi ngobhoko kulo mkhakha womculo oshisa izikhotha kuleli nasemazweni angaphandle, kodwa ukhombisile ukuthi ubizelwe emculweni.
Isicefe ngomculo wama-piano ukuthi abadidiyeli bawo babuye bavilaphe kwezinye izingoma. Yingakho ingoma nengoma yama-piano izwakala sengathi usuke wayizwa ngaphambilini.
Empeleni uma sewuzwe eyodwa usuke sewuzizwe zonke. UDrumboss ufike wakushintsha lokho ngokuthaka lomculo nesigqi se-house.
Kwezinye izingoma ubuye uzwe umnkenenezo we-trumpet nezinye izinsimbi. Ngakho uma uwuthanda ushuni kaHeavy K kodwa othakwe nama-piano, uzoyithakasela le-EP.