UKUNGALAHLI ithemba lokungenela umcimbi womdanso azama kuwo izikhathi ezingaphezu kwezintathu engawini kugcine kuthele izithelo ezihle kuSenzosenkosi Bhengu owaziwa ngo“Verb”.
UVerb udle umhlanganiso esigabeni sokugcina somcimbi womdanso emncintiswaneni wakuleli iSouth African Red Bull Dance Your Style National Champion!
Njengoba ekhale wemuka nalesi sicoco kulindeleke ukuthi ahambele umncintiswano iWorld Champion ezoba seGermany ngoNovemba 4, lapho eyoqophisana nabanye abadansi abaqhamuka emazweni aphesheya kwezilwandle.
Ekhuluma neSolezwe uVerb, uthe ukwenza kahle emdansweni obizwa ngeKrumping yikhona okumbeke lapho ekhona manje.
“Ngizizwa ngijabule kakhulu ngokudla umhlanganiso ngisekhaya edolobheni engikhulele kulo futhi ngiye esigabeni lapho ngizoqhudelana nabanye abadansi abavela emazweni ahlukene emhlabeni. Ngifuna ukukhula lapho ngikhona manje futhi ngikwazi ukuthi ngidle umhlanganiso esigabeni sokugcina lapho sizoqophisana nabanye ozakwethu abavela kwamanye amazwe. Sengikubheke ngabomvu ukumela izwe lami futhi ngibone nabanye abadansi basemazweni ahlukene. Ukuzethemba kwami kushintshe kakhulu futhi ngiyasho angingabazi ukuthi indondo ngizobuya nayo ekhaya,” kusho uVerb.
Uthe ukuwina lo mncintiswano bekuyiphupho lakhe leminyaka neligcine lifezekile.
Manje athe uzogxila kukho ukusiza intsha yaKwaZulu-Natal efuna ukungena emkhakheni wokudansa.