INGWAZI yomculo kamaskandi, uThokozani Langa, iqophe umlando ihlanganisa abakhangisi bengqephu nezintombi zomhlanga ngesikhathi ithwebula iDVD yayo KwaBhekakancane, oSizweni, eNewcastle, ngoMgqibelo.
Akusalanga ukuviliyela kwamabutho nomgidi wakwaShembe. UThokozani uthe ubeqopha iDVD yakhe ezophuma kulo nyaka futhi ezohlanganisa amanoni awatomule e-albhamini ethi Iyabuza Induna, Upopayi neyakamuva ethi Iqath' Eliziqobayo.
USomnandi ubonge kakhulu umelaphi wendabuko wakule ndawo, uDkt Phumlani "Umngcwab'Uyahlehla" Dlamini, ngokumxhasa ukuze lo mcimbi ube yimpumelelo.
"Ngaphandle kwakhe, bebungeke bubekhona bonke lobu buhle abantu abazobubona kwiDVD. Ngikhethe ukuzoqophela iDVD kule ndawo ngoba ngifisa ukuqhakambisa iNewcastle," kusho uSomnandi.
Yize izihlwele bezifike ngobuningi bazo kodwa bezingeqile esibalweni esibekiwe futhi iningi belifake izifonyo. USomnandi ushiyelane inkundla nezingwazi zesicathamiya, iNewcastle Five Roses, uLamula, Amagagu Amahle, Iqhikiza Lentombi, Untshebe Yembuzi, Isiphikeleli Sabafazi, umrepha uDr Bone, Ubuhle Bamangwe, Izingqwele ZaseNtendeka nabanye.
Uhlelo beluphethwe ngobuciko ngumsakazi weNew Newcastle Community Radio, uMagembe Mokoena, noweSiyaviva Online Radio, u-Andile "MC Pholobas" Ngcobo.
UDkt Umngcwab' Uhlehlile ubancome kakhulu abantu ngendlela abaziphathe ngayo kusukela kuqala umcimbi kwaze kwaba ufinyelela emaphethelweni.