OWAYENGUMSAKAZI woKhozi FM neVuma FM uLinda Sibiya usebonge umengameli we-Economic Freedom Fighters, uMnuz Julius Malema ngokulwela amaciko nalowo owayengumengameli wakuleli osejele, uMnuz Jacob Zuma.
ULinda, owayedume ngelikaMr Magic emsakazweni, ubhalele uMalema incwadi ayishicilele ekhasini lakhe kwiTwitter lapho ambonge khona ngokuba yizwi labampofu. Lokhu kulandela inkulumo kaMalema izolo ngesikhathi iqembu lakhe ligubha iminyaka engu-8 lasungulwa. Uthe njengenkakha yomethuli wezinhlelo nosomabhizisini uyiqaphelile futhi beyimchaza indlela ekhule ngayo i-EFF kwezombusazwe kuleli.
FUNDA: Amasosha aqinela abantu abahlwempu: Malema
“Ingithintile inkulumo yakho ngesikhathi ungxeka amasosha ngokuphuca abantu nemindeni ehlwempu ukudla ekubeni ngabe athatha impahla kagesi kuphela etatshiwe. Siyabonga ukuthi ukhulume iqiniso kwiziphathimandla,” kusho uLinda.
Uqhube wabonga uMalema ngokulwela amaciko, wamcela ukuthi aqhubeke awalakelele kwizingqinamba abhekene nazo.
“Okokugcina, ngiyabonga ngokuthi ukhulumele umengameli (owayengumengameli) Zuma . Njengoba ushilo izolo, asikho isidingo sokuthi abe sejele kule minyaka akuyo. Kwanele uma edonsa isigwebo sakhe ekhaya. Le nto oyishilo ngoNxamalala ikhombisa ubudoda. Uyindoda emadodeni.
@Julius_S_Malema @FloydShivambu @MagaselaMzobe @iamtbotouch @eNCA @SABCNews pic.twitter.com/fGIT8e9eQw
— Linda Sibiya (@Linda_Sibiya) July 27, 2021