KUZOKWENZEKA okungajwayelekile kuleli njengoba amakhosikazi abadlali beBanyana Banyana, okukhona kuwo uRefiloe Jane noBambanani Mbane bezoba ngabanye abazobonakala ohlelweni iSports Wives.
Lolu hlelo luzobheka ngqo ezimpilweni zalaba besifazane ukuthi baphila kanjani nabayeni babo abadumile emidlalweni ehlukene kuleli.
Kusuka ngoDisemba 5, lolu hlelo luzoqala ukukhonjiswa kuShowmax nokuyobe sekubonakala iziqephu zalo ezintsha njalo ngoLwesibili.
Ekhuluma ngalolu hlelo umsunguli walo uNonhlanhla Dhlamini, uveze ukuthi bekumele bakuqinisekise ukuthi isizini yokuqala yalolu hlelo isondele kubantu futhi iqukethe yonke into.
“Sikucabange kaningi ukuthi lolu hlelo silwenze luhluke njengoba sifake amakhosikazi abadlali kanjalo nezintombi zabo nabesifazane asebahlukana nabo uma kuziwa ebudlelwaneni bezothando. Ukufaka abesifazane abathandana nabobulili obufana nobabo nakho sikwenze ngoba bangabantu abakhona kodwa abanganakwa ekubeni benza kahle emikhakheni abakuyo la ekhaya naphesheya kwezilwandle,” kusho uNonhlanhla.
Uveze ukuthi kulolu hlelo, baveze okuyikho ngempela laba besifazane ababhekana nakho njengoba bechitha isikhathi sabo esiningi nalaba badlali.
“Uhlelo iSports Wives luzobheka izinto ezithinta abaningi okubalwa kuzo izinkinga zabazali abangabamukeli abanye abantu abashade namadodakazi abo noma namadodana abo, indlela okungakamukeleki ngayo impilo yabantu abathandana nobulili obufana nobabo kanjalo nabesifazane bazothola indlela yokuthi bazithole ukuthi bangobani njengoba sebenezingane, abayeni baphinde bazame indlela yokujwayela imindeni emisha abakuyo manje kanjalo nokuthola abangani abasha,” kuchaza yena.
Kwabanye abesifazane abazobonakala kukhona
• UBomzi September oshade nowayengumdlali uThabo September, manje osengumsizi womqeqeshi weqembu iSuperSport United.
• UChrista Kgamphe-Jane oshade nomdlali weBanyana Banyana uRefiloe Jane, ohlala e-Italy, uClarrisa Manaças osebudlelwaneni bezothando noLionel Mapoe owake wadlalela amaSpringboks neVodacom Bulls.
• UDipuo Maloi osezakhele igama kuleli njengoba enobaba bezingane abadumile ebholeni okungu-Andile Jali, odlalela iBafana Bafana, Orlando Pirates, Sundowns neMoroka Swallows noLantshene Phalane okuMoroka Swallows.
• UTsholo Makgalemele-Mbane oshade nomdlali weBanyana Banyana uBambanani Mbane kanye noSisanda Cetiywe onengane noKennedy Mwene waseZambia odlalela iSundowns.