KUNEMFIHLO ezodalulwa ngaye futhi ezokwenza abantu bakhulume, ngokusho kukaNonkanyiso “LaConco” Conco.
Kumanje usaziwayo uyingxenye yabesifazane abayisihiyagalombili ababoshelwe ohlelweni iThe Real Housewives Ultimate Girls Trip - South Africa.
Uhlelo luzoqala ukukhonjiswa ngoMeyi 27, kwiShowmax. Kuzobonakala abesifazane abadume ezinhlelweni ezehlukene zakuleli ezaziwa ngeThe Real Housewives, bethatha uhambo oluya eJamaica, beyongcebeleka.
Kulindeleke ukuthi bazikhinide zonke uma sebesondelene futhi yilapho kuzovela obala izinto ezahlukene ezithinta bona nemisebenzi yabo.
Echaza ngokuba yingxenye yohlelo uLaConco uthe, wahlangana nomunye uphrojusa bezokhuluma ngolunye oluhlukile kepha wagcina emtshela ngalolu akulo manje futhi waluthanda.
“Okwangithatha kakhulu ngohlelo yindawo angitshela ukuthi sizoshuthela kuyo. Ngathatheka ngaso leso sokhathi ngavuma yize ngangingazi ukuthi bangobani abanye besifazane abazoba yingxenye yalo. Kuthe sengibabona abanye besifazane kwacaca ukuthi siyazwana. Kwahluka okukaLondie, noNonku ngoba ngiyabazi kakhulu futhi sijwayelene ngake ngasebenza nabo ngaphambilini. Kwangisiza ukungazi lutho ngalolu hlelo kodwa kwangicacela sesiseJamaica, ukuthi sizokwenzani,” kuchaza uLaConco.
Uqhube wathi okuzoxoxwa ngaye muva nje ezinkundleni zokuxhumana nokuzovela ohlelweni ngeke kuze kumthuse ngoba usekujwayele.
"Manje ngingumuntu osemehlweni abantu. Ukubhekana nomphakathi ngezinto ezenzeka ezinhlelweni esizenzayo, kwenza ukuthi kukhulunywe ngathi ngezinto ezehlukene ngakho akukho okuzongiphazamisa manje. Ngakho ngilindele noma yini ezoqhamuka ngami uma sekukhonjiswa uhlelo, ngibheke ukuthi kuzokhulunywa bese kuyadlula ngoba ngiyazazi ukuthi ngingubani futhi iyiphi impilo engiyiphilayo,“ kuchaza uNonkanyiso.
Wengeze ngokuthi ukuba yingxenye yohlelo olunjena, ulindele ukuthi kuqhubeke nokumvulela eminye iminyango ehlukene.
ULaConco uthembise ababukeli bohlelo okuningi, wathi kuzoshuba kakhulu ngoba kuzoba wuhlelo lokuqala lwalolu hlobo eNingizimu Afrika.