UZOBUYA usugoqwa ngoMashi neziqephu zokugcina umdlalo iThe Wife, okumanje kukhonjiswa isizini yokugcina yawo kuShowmax. Umdlalo uzofinyelela emaphethelweni ngo-Ephreli 6, kanti uqale ukubonakala ngonyaka odlule.
Lokhu kudalulwe izolo abakwaShowmax, bathi isikhala somdlalo njengoba uthatha ikhefu, sizothathwa isizini yesithupha nokungeyokugcina yeThe River.
“Ukubuya komdlalo kuzophendula imibuzo abantu abanayo njengoba ithinta imindeni yomibili ekhona emdlalweni. Kodwa umbuzo abawubheke kakhulu ukuthi uphenduluke uthi ngabe uMthaniya yingane kaMqhele noma ekaQhawe? Uthando phakathi kukaHlomu noMqhele luzophela kanjani? Ngabe uzoba khona umshado nobudlelwane obuhle phakathi kwabakaZulu nabakwaMontsho,” kuchaza uKevin Kriedemann.
Uveze ukuthi kule nyaka ziningi izinhlelo zakuleli ezizobonakala kwiShowmax okubalwa nesizini yesibili yohlelo iDAM, lapho okulingisa phambili uPallance Dladla.
“Abalingisi okubalwa uZikhona Bali, Sizwe Khumbuza, Rosemary Zimu, Kere Nyawo noPascanline Phale bazogqama emdlalweni, iThato YaModimo. Lo mdlalo uthe uzoqala ukukhonjiswa esiteshini ngoFebhuwari 17. Isizini yokuqala yomdlalo ozophela maduzane kwiMzansi Magic, iDiepcity izoqala ukukhonjiswa Febhuwari 10,” kuchaza yena.
UKevin uveze ukuthi izinhlelo zabesifazane okubalwa iThe Real Housewives of Abuja, The Real Housewives of Durban, The Real Housewives of Nairobi zizoqhubeka nokukhonjiswa kwiShowmax njengoba besanda kuzethula.