UKUXINWA wukugula kuphoqe inkakha yakuleli edume umhlaba wonke, ukuthi ihoxe ekulingiseni indawo eqavile futhi ekade yayiyilangazelele.
UJohn Kani ngeke esabonakala edlala indawo kaTroy Maxon, emdlalweni weshashalazi ka-August Wilson, osihloko sithi Fences.
Esitatimendeni esithunyelelwe imithombo yezindaba, uKani uthi ukugula kumvimbe ukuba afeze iphupho lakhe leminyaka.
"Nakuba kunjalo kodwa ngizoqhubeka nokubamba iqhaza kulo mdlalo ngibe ngumdidiyeli futhi ngibuye ngiqhubeke nokuba yingxenye yethimba elizosebenzisana nomqondisi nabalingisi uma kuzilolongwa."
Yize ephoxekile uKani kodwa ubuye waduduzwa wukuvalwa kwesikhala sakhe ngumlingisi osemnkantshubomvu kule ndima, uTumisho Masha.
"Angikungabazi ukuthi uTumisho uzokwenza ubulungiswa kule ndawo enenselelo enkulu njengoba bengizokwenza."
UJohn ubuye wafisela umqondisi, abalingisi nethimba lonke okuhle kodwa ekukhonjisweni komdlalo.
"Ngiyethemba ukuthi ngizokwelulama kulokhu kugula kwesikhashana futhi ngizobuyela maduze emsebenzini."
Njengoba uTumisho ebezolingisa indawo kaJim Bono, le ndawo seyizodlalwa nguLunga Radebe.
Abanye abalingisi ababoshelwe emdlalweni ozoqala ukukhonjiswa eJoburg Theatre, eGoli kusukela ngoFebhuwari 2, nguHlomla Dandala, Atandwa Kani, Khutjo Green noSbusiso Mamba.
.