UMCULI omenywe wuJohn Legend ukuthi acule naye esiteji, uMthandazo Gatya, uyachichima yinjabulo ngalesi senzo.
UMthandazo ube sematheni ezinkundleni zokuxhumana ngemuva kwe-video ayifake lapho ecula khona engomeni kaJohn Legend, iNervous.
Kwenye yama-video uJohn Legend, okuleli, ubonakala ethi uyakujabulela ukuhlangana noMthandazo. Uthe useNingizimu Afrika.
“Ngibone okufake kuTikTok ngacabanga ukuthi ungathanda ukuthi senze ingoma ndawonye esiteji,” kusho uJohn Legend.
Imizamo yokuthola uMthandazo izolo, ayiphumelelanga njengoba ucingo lwakhe belungabanjwa.
Ekhuluma esiteshini sezindaba iNewzroom Afrika, uthe kumjabulisile ukuthi amenywe yilo mculo.
“Kube mnandi futhi kungenze ngakholwa ukuthi akukho okungakuvimba ukufeza amaphupho,” kusho uMthandazo.
Uthe njengamanje iNingizimu Afrika ibamba iqhaza elikhulu emculweni emhlabeni jikelele futhi leli zwe liqhamuke namapiano.
“Kufezeke iphupho kimi.”
Ekhuluma neSolezwe ngeledlule, uthe ungumlandeli omdala kaJohn Legend.
Uthe kumjabulisile ukuthi ubonwe nangamaciko okubalwa kuwo uBlack Coffee.