UMDIDIYELI womculo ohlonishwayo ngamagalelo akhe, uKabelo "Kabza De Small" Motha ubonge abalandeli bakhe ngokuthenga masinya baqeda amathikithi ekhonsathi yakhe ne-orchestra ezoba seLyric Theatre, eGold Reef City, eGoli ngoJuni 8.
UKabelo umemezele ngoLwesibili emini ukuthi uzoba nomcimbi iRed Bull Symphonic lapho ezodlala khona no-Ofentse Pitse ne-Symphonic Orchestra.
U-Ofentse wasePitoli, ungowesifazane wokuqala omnyama wakuleli ukuhola i-orchestra yabansundu.
Ugqame emhlabeni ngesikhathi enza ingoma ka-Alicia Keys i-If I Ain't Got You.
Amathikithi alo mcimbi abedayiswa ngemali eqala kuR250 agcine kuR650.
UKabza wodumo lwezingoma eziningi zamapiano, okubalwa kuzo eyakamuva eshisa izikhotha ethi Imithandazo ayishaya noMthunzi bapika kuyo uYoung Stunna, DJ Maphorisa, Sizwe Alakine noMthakathi Kush, ubonge abantu ngokumeseka.
"Ngiyabonga kakhulu bafowethu. Amathikithi adayise aphela ngamahora amahlanu.
“Sizobonana ngoJuni 8 eLyric Theatre no-Ofentse Pitse," kusho uKabza ekhasini lakhe lika-Instagram.
Lo mcimbi kuvela ukuthi uzoba khona kanye futhi endaweni eyodwa.
Abanye abantu bakhale ekhasini leRed Bull ukuthi kumele kwengezwe olunye usuku okanye kuyiwe endaweni enkudlwana.