INTOKAZI eyashiya isigubhukane emdlalweni Imbewu:The Seed, uFundiswa Zwane, izobonakala maduzane kwiRhythm City.
UFundiswa uzolingisa indawo kaLu, osemkhakheni wabameli, uzoqala ukubonakala kulo mdlalo okhonjiswa kwi-e.tv, ngo-Ephreli 28 kanti usethimbeni lokugcina labalingisi abasha njengoba maduzane kuzoqala isizini yokugcina.
Ekhuluma ngendawo azoyilingisa uFundiswa, uveze ukuthi abantu bazoyithanda ngoba kuzoba ngenye yezidonsa amehlo.
“Ukulingisa ngenye yezinto engizithanda kakhulu njengoba kuyona yonke indawo enginikwa yona uma kuthiwa angiyilingise, ngiyayenzisisa. Indlela engifike ngaphatheka ngayo kulo mdlalo kumina isho lukhulu nokungethemba nje ngale ndawo kuyangijabulisa. Ngisenesikhathi esimnandi impela ngiqopha kulo mdlalo,” kuchaza uFundiswa.
IRhythm City kulindeleke ukuthi ifinyelele emaphethelweni ekuqaleni kukaJulayi. Umdlalo ozovala isikhala sayo usuqalile uyaqoshwa. Umdlalo omusha othi House of Zwides, kulindeleke ukuthi uqale uma kuphela iRhythm City.
Abalingisi okulindeleke ukuthi babonakale kulo mdlalo omusha kubalwa uBaby Cele noLindani Nkosi. Abalingisi bomdlalo iRhythm City, baphelelwa yimisebenzi nje isiteshi sakwa-e.tv sibavalelise ngamabhonasi ukubabonga ngokuzinikela kwabo.