UKHONJWA kwiSABC 1 kusuka ngoSepthemba 6, umdlalo iThe Estate, okumanje ukhonjiswa kwiS3, ngo7 ebusuku.
KwiSABC 1, lo mdlalo uzokhonjiswa ngo7.30 ebusuku, phakathi nezinsuku.
Lo mdlalo owavala isikhala somdlalo, Isidingo, uqale ukubonakala kwithelevishini ngo-Ephreli kanti ubophele abalingisi okukhona kubo uSdumo Mtshali, Nambitha Ben Mazwi, Don Mlangeni nabanye.
AbakwaSABC baveze ukuthi balethela abantu abangakaze bawubone lo mdlalo, nabafuna ukubanika ithuba lokuthi bawubone ekuqaleni.
"Umdlalo ubheka imindeni ehlukene nebambene ngezihluthu ngenxa yomhlaba, amandla nemali. Ukhombisa ngesigwili esikhona nasemkhakheni wepolitiki esiphethe indawo yomntakabani esilwa nabantu abafuna umhlaba wabo, okungabantu abahlala endaweni okuthiwa kuseThembalethu," kusho isitatimende.
Baveze ukuthi kwiS3, abantu bangalindela ukubona ubuso obusha njengoba u-Aubrey Poo ejoyina lo mdlalo ezolingisa indawo kaCastro Kamanga.
UCastro ungusopolitiki onamacebo angemahle njengoba ezobhekana ngqo noShadrack (Don Mlangeni).
"Eziqephini zokuqala zalo mdlalo, abantu bazokhonjiswa impi eqhubekayo kubantu abafuna umhlaba wabo nalo somabhizinisi. Bazophinde bakhonjiswe ukungahambi kahle komshado kaMuzi noLwandle emuva lokuthi kufika intokazi eyiqola, uGigi, okuyindawo elingisa uNambitha Ben-Mazwi," kuchaza isitatimende.
Abanye abalingisi abazobonakala kuwona kukhona kubo abekade belingisa emdlalweni i-7de Laan, uJacques Blign noHildegardt Whites.