OBEYINTANDOKAZI yomethuli wohlelo lwethelevishini, Idols SA, nobenyamalale isikhashana ngenxa yezinkinga, wenza ibuya ngohlelo olusha kwiMoja Love.
USomizi Mhlongo, ubuya ngeLovey Dovey, uhlelo olusha lapho abantu bezofuna uthando nomshado, oluzobonakala kwiMoja Love (157HD).
Lokhu kumenyenzelwe kuleli sonto yiMoja Love yathi, uSomizi uzobuya ngohlelo olusha oluzosakazwa bukhoma kusukela ngoFebhuwari 2022. Abazoba yingxenye yohlelo kuzoba ngabantu abafuna uthando nomshado futhi bazowina imali enguR500 000.
Abadidiyeli bohlelo sebebatholile abantu abafuna izithandani nomaqondana, nomshado. Abangenele bazonikezwa isikhathi sokuthi bazane kangcono behlezi eSummerfell River Lake, eseVaal River, okuyindawo yokungcebeleka ebiza uR50 000 ubusuku obubodwa.
Ngokusho kwabeLovey Dovey, abantu abangenele bazochitha amasonto amathathu bendawonye kule ndawo, befundana ngenhloso yokuthola umakoti noma umyeni. Asebekhethene kuzomele benze okusemandleni ukukhombisa ukuthi bayathandana ngempela.
Omunye wophrojusa bohlelo uthe kuzohlala kunento entsha zonke izinsuku ukuhlola uthando lwabo, kuphinde kukhishwe abangenzi kahle. Abazowina bazohlolwa nangemuva komshado.
Isikhulu esiphezulu seMoja Love, u-Aubrey Tau sithe: “ Kuningi abantu abangakulindela kwiMoja Love. Sinezinhlelo ezintsha njengeLovey Dovey, umdlalo wamahlaya, Umuzi Wa Badala, Ko Strateng, X-Repo nezinye. ILovey Dovey izoba nkulu ezinhlelweni ezintsha futhi nginethemba lokuthi izoba ngezinye izinhlelo ezihamba phambili. Sifuna ukwenza isiqiniseko sokugcina ababukeli belandela izinhlelo zethu, ikakhulukazi abasebancane okuyinto enzima ukuthola intsha elandela izinhlelo zethelevishini.”