UMETHULI wezinhlelo zethelevishini futhi obuye abe wumlingisi wemidlalo yeTV, uNomakula "Kuli" Roberts, uthi usenqume ukuzisiza ngamathoyizi ocansi uma ekhanukele ucansi okunokulufuna kubantu besilisa.
Ubebuzwa umethuli wohlelo lweYouTube Channel iPodcast and Chill with MacG, uMcGyver "MacG" Mukwevho ukuthi njengamanje kuhamba kanjani kwezothando.
"Sesiside isikhathi ngagcina ukulalwa. Ngizitika ngama-vibrator. Ayangisanganisa. Ayihlaba esikhonkosini. Ama-vibrator ami ayamangalisa," kusho uKuli (38) oke walingisa indawo kaMildred emdlalweni osakazwa kuMzansi Magic i-The Queen.
Uthe akuthanda ngama-vibrator ukuthi uma uqeda ukufika kuvuthondaba, awalokhu ekucefezela. "Njengokuthi 'unjani honey? Lunjani usuku lwakho. Bekumnandi? Oh baby’. Awukho lowo mbhedo."
UKuli uthe emuva kokuzijabulisa nge-vibrator uyahamba ayogeza bese elala zwi. Akagcinanga ngokukhuluma kodwa uze wakhipha elinye ithoyizi eliwumphambili. Uthe lingelinye lamathoyizi afika nozakwabo uNina Hastie kade evakashele seJapan. "Wayesecikekile ukusebenzisa kwethu ama-vibrator."
Nakuba kunjalo uthe yena usaqhubeka nokusebenzisa ama-vibrator kube wubu-zzz, aze akhombise ngokuqhaqhazelisa umzimba.
Eqhubeka, uthe uma umuntu ekhula eba mdala, yilapho ebona khona ukuthi empeleni asikho isidingo sokulala nomuntu ngoba nakhu ninobudlelwano naye.
"Ozolokhu ekutshela 'Ngiyakuthanda futhi ngifonele zonke izinsuku.' Ungazitika ngocansi nomuntu ongelutho naye, hhayi manje njengoba kuneCovid."
Uphinde wadalula ukuthi yena uthanda ukuzitika ngocansi nabafanyana hhayi nabesilisa abongontanga yakhe.
UKuli uzobonakala kwifilimu ezokhonjiswa kuNetflix kusukela ngo-Okthoba 8 kulo nyaka esihloko sithi Angeliena. Kule filimu uzobe elingisa no-Euodia Samson, Tshamano Sebe, Colin Moss, Thapelo Mokoena, Nicole Madell, Marciel Hopkins, Schalk Bezuidenhout, Sandra Prinsloo noToya Delazy. Le ntokazi yaqala ukwaziwa njengentatheli kodwa egcine isingumethuli wezinhlelo zeTV okubalwa kulo iReal Gobhoza, iHeadline neTrending SA. Uke wasakaza nohlelo lwasekuseni kwiKaya FM.