USETHUBENI lokuhlabana ngendondo kumaSouth African Film and Television Awards (SAFTA) umethuli wezinhlelo uKatlego Maboe owazakhela udumo ethula izinhlelo kuSABC nezikhangiso zakwa-OUTSurance.
UKatlego ungene emunxeni weBest Presenter ngomsebenzi awushaya kwiTropika Island of Treasure Curacao. Uqhathwe nomsakazi weMetro FM uDineo Ranaka, intatheli uDevi Sankaree Govender, Entle Bizane othula iHectic on 3, Palesa Tembe, Katchie Nzama noWaldimar Pelser.
Lo methuli wezinhlelo ube sematheni ezinkundleni zokuxhumana ngemuva kwesimemezelo samaSAFTA kwazise uke walandelwa yizigemegeme nyakenye kulandela ukusabalala kwe-video yakhe evuma eyokuphinga emshadweni.
UKatlego wazidonsela amanzi ngomsele ngale video njengoba yaholela ekutheni akhonjwe afika ngayo kwa-OUTSuruance kwaqashwa abasha ukuqhubeka nomsebenzi wakhe.
Lokhu kwathusa abaningi kwazise zazisathakaselwa abaningi izikhangiso zakhe ayebonakala kuzo ekhuluma nabanikazi bezimoto ethi ‘chenca daideng’.
Kwabahambe phambili eminxeni ehlukeni kubalwa iTshedza Pictures ekhiqiza i-The River neThe Legacy esethubeni lokunqoba izindondo eziwu-24.