CHARLES KHUZWAYO
UMLINGISI obesegxile kakhulu ekubeni nguDJ, uKhanya Mkangisa, wenza ibuya kwiThe Queen ngoMsombuluko ozayo. Lezi zindaba zidalulwe nguKhanya ekhasini lakhe le-Instagram.
"Bengifuna ukulinda kodwa ngiyehluleka manje. U-Akhona ukhuza ibuya ngomhla ka-25 Okthoba," kusho uKhanya.
Udalule lokhu waveza nesithombe sakhe encike esicabheni sasestudiyo lapho beqophela khona iThe Queen, esinombhalo othi Ferguson Films...Khanya Mkangisa...'Akhona'.
UKhanya (33) ubesengene emkhakheni wokudijeya kanti ngo-2019 wayenandisa kwiJozi to Quilox Weekend Festival eLagos, eNigeria. Nyakenye ubuyile ekulingiseni lapho ebedlala indawo kaMbali kuMuvhango.
Ngaphambi kweThe Queen, uKhanya uke wadlala indawo ka-Aphiwe Nzimande kwiSidingo, ekaNonhle kwiForced Love, ekaLindiwe kwiDoubt nekaJoy Rammala kwiStep Up To A Start Up. Sekungumlando ukuthi uKhanya uqale ukuvela kwiTV eneminyaka ewu-14, ngesikhathi esathula izinhlelo zezingane kwiYo TV.
Wabe esedlulela ohlelweni iKnock Knock, kwathi ngo-2004 walingisa kuMtunzini.com, The Lab nakwifilimu iGugu no-Andile. Umlando wakhe kwezokulingisa umfake kwiZone 14; Intersexions; Mad Dogs 111 nakwiZabalaza lapho ebedlala indawo kaMpilo.