UMBHALI wezincwadi ezithandwa ngabantu besifazane iHlomu Series, uthi ufisa ukuthi okwenzeka kuye njengoba izincwadi zakhe zizophendulwa umdlalo wethelevishini, kungagcini ngaye kodwa nabanye ababhali bathole ithuba elifana nelakhe.
IShowmax ikhiphe isitatimende ngoLwesithathu, iveza ukuthi izoqala ukukhombisa itelenovela yokuqala iThe Wife, esuselwe ezincwadini iHlomu series, ezibhalwe nguNkk Busani Dube
UNkk Dudu Busani Dube uthi akujwayelekile ukwenzeka kuleli ukuthi kwenziwa umdlalo wethelevishini, osuselwa encwadini.
“Ngiyathemba ukuthi lokhu kuzoqhubeka kwenzeke nakwabanye ababhali. Ngijabulela nokuthi abafundi bezincwadi zami sebezokuthola abakufunayo. Kade babefisa ukuthi izincwadi zami zenziwe imidlalo. Ngijabule kakhulu ngokuthi lolu chungechunge lwezincwadi seluzoqoshwa lube wumdlalo we-TV. Lento yinto enkulu ngijabule ngendlela eyisimanga,” kusho uNkk Busani Dube.
Uthe kunenye incwadi ezayo okumele bayilindele abafundi bakhe kanti ihambisana nalolu chungechunge lweHlomu the Wife.
“Ngizokhipha incwadi yokugcina bese ngiyaluvala lolu chungechunge. Sengiyibhalile ngisahlela ukuthi ngizoyethula nini kodwa ngizobazisa abafundi bami,” kubeka uNkk Busani, Dube.
IShowmax ithe kuzoba khona iziqephu eziwu-120 ezisuselwa ezincwadini iHlomu the Wife, Zandile the Resolute neNaledi his Love.
“Iziqephu eziwu-40 zokuqala zizobe zigxile kuHlomu oyintatheli egcina isithandana nosomatekisi, ingazi ukuthi nguye owenza ubugebengu abuphenyayo,” kusho iShowmax kwisitatimende.
Kuthiwa uchungechunge luzodidiyelwa yiStained Glass, okuyinkampani esikhiqize imidlalo ethandwa kakhulu kuleli, Uzalo neHostela.