CHARLES KHUZWAYO
BASINA bededelane osaziwayo enkonzweni yokukhumbula iciko ebelinenqwaba yamakhono, uNomakula "Kuli" Roberts, eGoli namhlanje. Lesi sikhumbuzo sikaKuli (49) sisakazwa bukhoma ezinkundleni zokuxhumana.
Lezi zindaba zidalulwe ngesitatimende esibhalwe ngokuhlanganyelwa wumndeni okuzalwa kuwo uKuli, wakwaMboya, nowalapho abendele khona wakwaRoberts. UKuli udlule emhlabeni ngoLwesithathu olwedlule emuva kokumelwa yinhliziyo.
Le mindeni ibonge kakhulu ukwesekwa ekuthole emphakathini kulezi zinsuku ezedlule.
UKuli waqala ukuzakhela udumo ngokuba yintatheli ngaphambi kokusakaza uhlelo lwasekuseni kwiKaya FM futhi wethula uhlelo lwethelevishini iTrending SA. Ubuye walingisa kwiThe Queen kuMzansi Magic nasefilimini esakazwe kwiNetflix ethi Angelina.
Ushiye emhlabeni abantwana ababili, umzukulu, abazali nezingane zakwabo ezintathu.
UKuli uzofihlwa kusasa emngcwabeni ozobe uhanjelwe ngamalungu omndeni kuphela.