KUSHAQEKE abantu abaningi umethuli wezinhlelo zethelevishini futhi ongumlingisi uThembisa Mdoda-Nxumalo edalula ukuthi kumbulwa kwembeswa kuye esibhedlela.
UThembisa ubhale kuTwitter ukuthi uxinwe wukugula esibhedlela. Udalula lezi zindaba nje iningi lisazikhotha amanxeba njengoba lendima yezokungcebeleka isanda kushiywa emhlabeni ngobelingisa futhi enguphrojusa kwiThe Queen, uShona Ferguson. UThembisa uthe kubuhlungu kakhulu kuye njengoba nakuye kubonwa ngokusa esibhedlela.
"Ingane yami iyaluqonda usizi engibhekene nalo futhi iyangiduduza namhlanje ocingweni ngenxa yokuthi yazi kahle ukuthi nami ngisabela impilo yami embhedeni wasesibhedlela. Lwaze lwalubi usuku," kubhala uThembisa ozakhele udumo ngokwethula uhlelo lwezemishado kuMzansi Magic, i-Our Perfect Wedding futhi wabuye wabambela uZandile Msutwana ekulingiseni indawo kaVuyiswa Maake kwiThe Queen.
Ngebhadi akachazanga ukuthi ukugula kwakhe kuwuhlobo luni nembangela yakho. Kunalokho uthe nje ubambekile futhi udinga ukushaywa wumoya ukuze agxile ekuzelapheni nasekuthandeni abantu. "Empeleni anginawo amandla okwenza noma yini. Isikhathi sokuba ngedwa. Phephani bakithi. Thanda abathandiweyo bakho. Ubathande kakhulu," kuphetha uThembisa oke wasakaza kwiMetro FM. Imizamo yokuthola ukuphawula kwakhe neziphathimandla zakhe ayiphumelelanga kwaze kwashaya isikhathi sokushicilela.