ZIYAWUSHAYA ngeSonto kumlingisi wemidlalo yethelevishini wasendaweni yaseMkhamango, eMpangeni, uSboniso Nxumalo.
USboniso owaduma kakhulu edlala indawo ka-Oscar kwiSithembiso kodwa oselingisa indawo kaThabethe kwiLingashoni ku-1 Magic, uzobopha ifindo likasofa silahlane noNksz Musa Dlamini waseZinkanekisweni, kwaNongoma.
USboniso uthe wahlangana noMusa eMpangeni ngo-2007 kodwa babuye bahlukana ngo-2010.
“Sabuyelana ngo-2013, ngabe sengiqonda kubo ngayokhokha amalobolo njengoba sizoshada ngoDisemba 26.”
Uthe yena uzobe emiswe ngozakwabo okungoLemogang Tsipa owayenguBhambatha kwiSithembiso, uBhekisizwe Mahlawe onguCalvin kwiDurban Gen, uThobani Nzuza onguMndeni kwiHostela noSbusiso Madondo owayengu-Abednego kwiSithembiso.
"Umphathi wohlelo kuzobe kungumlingisi uMthandeni Mbambo waseNgwelezane, naye olingisa indawo yephoyisa kwiDurban Gen.“
Kulo “mshado wodumo” kulindeleke izinkumbi zabantu njengoba kuzokube kungumshado wonyaka eNseleni, kwazise kuzobe kukhona osaziwayo.
Ne-after wedding party ngeke ingabibikho njengoba nomkhwenyana aphinde abe umhleli omkhulu wemicimbi.
Kafushane nje, uSboniso waqala ukulingisa kuMuvhango ngo-2010, nakwifilimu emfishane ethi Cheese Boy.
Wabe esejoyina Isibaya, The Road nefilimu iBack of the Moon.
UMusa akekho kulo mkhakha wezokungcebeleka njengoba eyimenenja yasepulazini iMahlangosi Pty Ltd oPhongolo. Yintokazi engathathi amashansi kulo mkhakha wezolimo njengoba eneziqu zeCrop Production neB Tech kwezolimo nesitifiketi emkhakheni wezemfundo.