ABANEME ababukeli bomdlalo wethelevishini iDurban Gen, ngokugcwala kwabalingisi abadume kuZalo. Intuthukuthelo yabo bayikhombise enkundleni yezokuxhumana iFacebook, ngesikhathi kuvalelisa omunye umlingisi kulo mdlalo uLerato Nxumalo obenguDkt Ndabezinhle Nxumalo.
ULerato uselingisa indawo kaMpumi Cele, emdlalweni omusha osakazwa kwi-1 Magic osihloko sithi Lingashoni. Kwenzeka lokhu nje, ababukeli bebesazikhotha amanxeba ngokuhamba kukaFanele Zulu, obelingisa indawo kaDkt Mnqobi Mchunu, kepha osedlala indawo kaNJ Cele kwiLingashoni. Okuphinde kwafaka usawoti esilondeni ukugcwala kakhulu kwabalingisi abaziwa bedlala kuZalo.
"Nasethulela abalingisi abasha, sanithanda kodwa manje seniyabasusa. Senisilethela abalingisi boZalo. Nibaletha ngamunye, ngamunye. Naze nashesha ukusenza imid...i. Anikaqedi nezinyanga eziyisithupha," kubhala uLoyolo Huna.
"Ngempela bafunani labalingisi ababhorayo boZalo. Kufanele ngabe bakholelwa kubalingisi babo kunokuthembela kwabo Zalo olufayo," kusho uPoppy Mbuso Nkosi.
NoZinhle Zuma ubuze ukuthi kungani bezogcwalisa abalingisi aphuma kuZalo emdlalweni iDurban Gen.
"Umdlalo omusha futhi omnandi kabi ngenxa yabalingisi abasha. Nizolahlekelwa ngababukeli," kusho uZinhle.
NoSiindi Gumede unxuse iStained Glass TV Productions ukuba ihlukane nomkhuba wokulokhu ugcaluzisa amalingisi ababodwa emidlalweni yayo. Ubesho kanje ngenxa yokuthi Uzalo, iDurban Gen neLingashoni badidiyelwa yile nkampani.
"Siletheleni ubuso obusha. Baningi abantu abaswele imisebenzi lapha ngaphandle. Ingcono neMbewu ngoba yasilethela abantu esasingabazi, ikakhulu abasebenza eMsamo," kusho uSindi.
URefuwe Papiyana uthe isenzo seDurban Gen sizoyilahlekisela ngababukeli. "Nimatasatasa nixoshana nobuso obusha bese nengeza ngaboZalo. Ngokushesha iDurban Gen izophelelwa wumsoco," kuphetha uRefuwe.
Phakathi kwabalingisi abasuka kuZalo, kubalwa uThibedi Nyalleng nguZekhethelo, uNoxolo Mathula onguLilly, uNompilo Maphumulo onguNosipho, uThembinkosi Thwala onguMondli, uThulane Shange onguDkt Mandla Ngcobo noL'vovo Derrango obenguMandla.
Abanye asebeke balingisa kuZalo kodwa asebekwiDurban Gen ngoZimiphi Biyela onguSister Nobuhle, Sthandwa Nzuza onguZandile Mkhize, Fanele Ntuli osenguDkt Thandekile Zondo, Zulu Boy osenguMcGyver, u-Abdul Khoza onguSmiso, Bheki Sibiya onguDkt Ndlovu noSfiso Simamane onguNxele.
Imizamo yokuthola uNomfundo Zondi okhulumela abakhiqiza le midlalo ukuba aphawule, ayiphumelelanga kwaze kwashicilelwa. Kuhluleke esethunyelelwa imibuzo nge-sms, WhatsApp ne-email.